Doalahit Suodjalusa helikoptera Girkonjárggas vai áibmoambulánssa gearggusvuohta bisuhuvvo.
Ráđđehus lea mearridan čuovvulit Davvi Dearvvašvuođa ávžžuhusa bisuhit Suodjalusa Bell-helikoptera Girkonjárggas. Dál lea mearriduvvon ahte helikopter galgá Girkonjárggas stationerejuvvot gitta cuoŋománu 15. beaivvi rádjái.
Dearvvašvuođaministtar Bent Høie lea bivdán dearvvašvuođaguovlluid ohcat čovdosa ja nu jođánit go vejolaš gávdnat ambulánsahelikoptera mii sáhttá gaskaboddosaččat leahkit Girkonjárgga stašuvnnas. Dassážii go dasa boahtá čoavddus, de galgá Suodjalusa helikopter bissut Finnmárkkus.
Dasa lassin lea liigejetgirdi Romssas mii galgá veahkkin áibmoambulánssa gearggusvuhtii, ja nannet gearggusvuođa Svalbárddas, čállá NTB.
