Ovttaskas miellahtut Bargiidbellodaga sámediggejoavkkus dorjot Sara, ja ávžžuhit eará sámediggepolitihkkariid dahkat seamma. Vaikko Saras lea nuvttá riekteveahkki, de lohká Marit Kirsten A. Gaup ahte lea dehálaš doarjut su.
Ovttaskas miellahtut Bargiidbellodaga sámediggejoavkkus dorjot Sara, ja ávžžuhit eará sámediggepolitihkkariid dahkat seamma. Vaikko Saras lea nuvttá riekteveahkki, de lohká Marit Kirsten A. Gaup ahte lea dehálaš doarjut su.
Bargiidbellodaga sámediggejoavku ávžžuha iežaset Facebook-siiddus olbmuid ja erenoamážit eará politihkkariid ruđalaččat doarjut Jovsset Ánte Sara. Sin mielas lea dat dehálaš ášši, ii dušše Sarai, muhto olles Sápmái. Danne leat Bargiidbellodaga sámedikkejoavkku miellahtut mearridan doarjut su ruđalaččat.
– Mii leat ovttaskas miellahtut dorjon, mii máksit ieža ja ávžžuhit eará sámediggepolitihkkariid dahkat seamma, lohká joavkojođiheaddji Marit Kirsten A. Gaup
Gaup lohká ahte dát ášši ii guoskkat dušše boazodoalu, muhto buot sámi rivttiid, nu go guolásteami ja eará ealáhusaid.
– Min mielas lea dehálaš doarjut go oaidnit das mii dáhpáhuvvá leat olu boasttuvuođat. Jus dát ášši čuožžu nu go lea, de ferte stáda álgit geahčadit ođđasit buot, ja lágaid maid rievdadit. Dás ferte boahtit konsekveansa mii guoská olles ealáhussii, ja lea prinsihpalaš ášši, lohká Gaup.
– Nuvttá riekteveahkki ii govčča buot
Stáhta lea guoddalan Sara ášši Alimusriektái, muhto ii leat vel mearriduvvon váldá go Alimusriekti ášši, vai hilgu go guoddaleami.
– Jus ášši gártá Alimusriektái, ja doppe ii mana bures, soaitá šaddat vel viidásit mannat. Ruhta galgá sutnje doarjjan ahte ii galgga dárbbašit gillát iežas ruđain. Lea duostilis ja nuorra gánda ja mii leat geatnegahtton čuožžilit duogábeallai go lea stuora ášši mii dáhpáhuvvá Sámis, lohká Gaup. Son lohká gal sin doaivut Sara vuoitá jus ášši váldo Alimusriektái.
Jovsset Ánte Sara lea vuoitán sihke diggegottis ja lágamánnerievttis, ja duomuin celko ahte sutnje eai galgga áššegolut. Sus lea maid nuvttá riekteveahkki leamaš goappaš diggeásahusain.
– Muhto nuvttá riekteveahkki ii govčča buot goluid, čuožžilit olu golut maid dat ii doarjjo. Sus leat eambbo golut go dušše advokáhtta, son dárbbaša iežas olbmuid fárrui, ja dat maid máksá, lohká Gaup.
Oaččui 77 000 ruvnno
Doarjjakonsearttas Kárášjogas árabut dán giđa geigejuvvui Jovsset Ante Sarai 77 000 ruvnno, man olbmot geat dorjot su leat addán. Ávvirii Sara muitalii ahte ruhta galgá mannat boazodollui, go ii leat ožžon doarjagiid stádas, ii ge boraspirevahága dan rájes go ášši gárttai diggái. Sara logai maid ahte ruhta manná vánddardit dikki oktavuođas.
Jovsset Ante Sara beaivesáhkku lea maid jođus, go ii leat miehtan stáhta gáibádussii, unnidit boazologu. Ii leat ovdalgihtii mearriduvvon ahte lea nuvttá riekteveahkki jus ášši manná Alimusriektái. Dan ferte ohcat Fylkkamánnis dahje Alimusrievttis.
