-Almmuhus-
OĐĐASATBáhkat bistet guhkimusat Finnmárkkus

Báhkat bistet guhkimusat Finnmárkkus

-

-

Olbmot leat jearahišgoahtán čoaskáset dálkki, muitala dálkedieđiheaddji. Ollu báikkiin čájehedje mihtut 30 lieggagráda disdaga beaivet. Ovddeš dálkeolahusat sáhttet rievdat davvin.

– Go oaidnit man báhkka lea jo diibmu 11:s, de leat buorit vejolašvuođat ođđa olahusaid bidjat, duođašta dálkedieđiheaddji Ida Fossli NTB:i.

Disdaga lei 30,1 lieggagráda Dieváidvuovddis Romssas, ja dat lea dušše 2,6 gráda čoaskáset go mii lei suoidnemánu olahus Romssas. Dalle lei 2014:s  Ivgubađas 32,7 gráda. 

Suoidnemánu olahus Finnmárkkus lei Leavnnjas 1988:s go lei 33 lieggagráda.

 

Báhkat bistet Finnmárkkus

– Lea alladeatta mii lea Guoládaga badjel mii váikkuha liegga dálkkiide Davvi-Norggas, lassin daidda liegga biekkaide mat lulde bohtet, čilge Fossli, ja lohká ahte davimus fylkkat sáhttet vuordit báhkaid vel moadde beaivvi.

Disdaga ja gaskavahkku leat dat báhkkaseamos beaivvit. Duorastaga lahkona arvedálki Nordlándda ja Romssa guvlui, muhto Finnmárkkus bistet báhkat vel duorastaga ja bearjadaga.

Fossli muitala erenoamáš dáhpáhusa birra daid maŋemus beivviid.

– Olbmot leat váldán minguin oktavuođa ja jearran ii go čoaskáset dálki fargga leat boahtime, ja dat ii leat nu dábálaš jearrat mis, lohká son.

(©NTB)

 

 

-Almmuhus-