Guovdageainnu suohkan lea maid dál váldán atnui appa, vaikko oaivvildit sii juo dihtet ovdalaččas eanaš billistemiid birra suohkanis.
Guovdageainnu suohkan lea maid dál váldán atnui appa, vaikko oaivvildit sii juo dihtet ovdalaččas eanaš billistemiid birra suohkanis.
«Fiks gata mi», dahje sámegillii «divo mu geainnu», lea neahttabálvalus ja applikašuvdna man Norwegian Unix User Group (NUUG) fállá almmolaš ásahusaide. Fálaldat doaimmahuvvo eaktodáhtolaččat.
Ii dárbu jurddašit geasa dieđihit
Fálaldaga lea riikaviidosaš ja jurdda lea ahte geavaheaddjit galget sáhttit mannat neahttasiidui ja dieđihit ja digaštallat vuosttažettiin johtolatgullevaš váttisvuođaid maid gávdnet iežaset lagasbirrasis.
– Nu eai dárbbaš geavaheaddjit jurddašit makkár almmolaš ásahussii váttisvuohta gullá ja geasa galgá dieđihit. De sádde neahttasiidu e-poastta báikkálaš eiseválddiide gosa dieđihuvvon váttisvuohta gullá, muitala NUUG doaimmaheaddji Petter Reinholdtsen.
Áigá biddjon johtui
Váttisvuođat sáhttet leat ovdamearkka dihte nu movt geainnut billahuvvan, cuovkanan geaidnočuovggat, doabbarat dahje eará billisteamit. NUUG bijai álggos johtui doaimma juo jagi 2011, ja ovddit jagi bođii maiddái applikašuvdna mátketelefuvnnaide.
Álkibut dieđihit
Guovdageainnu suohkan lea dál almmuhan ahte sin maid ássiide lea vejolaš dan geavahit. Guovdageainnu suohkana teknihkalaš ossodaga jođiheaddji Sindre Murud lohká sii eai leat njulgestaga mielde dies, muhto fálaldat lea gávdnomis suohkanis.
– Fálaldat lea iešalddis buorre, go álkida olbmuide váldit minguin oktavuođa. Murud lea ieš geahčadan neahttasiiddu, ja lohká oaidnán juo olbmuid dieđihan váttisvuođaid dohko.
– Doppe oidno dieđihuvvon asfálta billahuvvan Ájastealligeainnus, muhto dat váttisvuohta lea juo oahpis suohkanii, lohká son.
Dihtet juo eanaš váttisvuođaid
Son lohká sidjiide ii soaitte leat nu dárbu diekkár fálaldahkii go dábálaččat olbmot váldet oktavuođa eará kanálaid čađa, ja danne ii leat nu stuora váttisvuohta diehtit gos suohkanis gávdnojit ovdamearkka dihte heajos asfálttat, cuovkanan dahje jáddan geaidnočuovggat.
– Sáhttá gal goitge dagahit ahte olbmot gillejit dieđihit smávit váttisvuođaid, maid muđui eai gilleše dieđihit, ja de álkibut sáhttet dat čovdojuvvot, lohká Murud.
Unnán ruhta divodemiide
Murud muitala suohkana bealis lea baicca stuorát čuolbma resurssaiguin.
– Mis eai leat juolluduvvon ruđat geavahit diekkáriidda, ja de ii ábut vaikko movt dieđiha váttisvuođaid birra.
Eai sáhte bidjat entreprenevrraid ala
Murud čilge suohkanis leat šiehtadusat entreprenevrraiguin geat dálvet čorgejit muohttaga geainnuin, ahte sii maiddái dollet geainnuid ortnegis bievlaáiggi.
– Dat dieđusge lea dakkár smávit divvumiid, nu movt deavdit rokkiid. Muhto jus lea sáhka stuorit divodemiin, de eat sáhte gáibidit ahte daid galget divvut, lohká Murud.
