Speallu «Battlefield» lea soahtespeallu nuppi máilmmisoađi birra ja guovddáš báiki spealus lea Áhkánjárga gos spealat lihtolaččaid bealis. Historihkkára mielas lea somá oaidnit.
Spealu bargu gohčoduvvo «Nordlys War Story» ja oasážis, mii almmuhuvvui geassemánus, oaidná sihke váriid, ruovdemáđii ja Áhkánjárgga fanasgátti.
Lea DICE fitnodat mii ráhkada «Battlefield» spealu mas sohtet Áhkánjárgga badjel, ja speallu almmuhuvvo golggotmánu, čállá NRK Nordland. Ráhkadeaddjit eai áiggo suođđat spealu sisdoalu, muhto almmolaš filbmaoasážis čájehuvvojit garra soahtámušat Áhkánjárggas ja almmis oidnojit guovssahasat.
– Lea issoras somá. Dušše dan unna filmmažis, man lea oaidnán, de oainnán oahpes báikkiid. Beassat leat mielde spealus ja vázzit dakkár spealus lea hirbmat gelddolaš, lohká Áhkánjárgga soahtemusea jođiheaddji Ulf Eirik Torgersen NRK:i.