Kárášjoga Bargiidbellodat, Olgešbellodat, Sámeálbmot Bellodat (SáB) ja Johttisámiid Listu (JSL) leat šiehtadan bargat ovttas Kárášjoga gielddastivrras 2019-2023 áigodagas.
Kárášjoga gielddastivrra ovttasbargoguoimmit čállet preassadieđáhusas, ahte sátnejođiheaddjin šaddá Ánddá Niillasa Svein ja várresátnejođiheaddjin fas Waldemar Jovnna.
Politihkalaš vuođđun galgá:
Kárášjoga BB, O, SáB ja JSL oktasaš mihttun lea ovddidit Kárášjoga gieldda fátmmasteaddji gieldan gos lea buorre orrut ja bajásšaddat.
Sámegiella ja kultuvra oktain boazodoaluin leat vuođđun BB, O, SáB ja JSL ovttasbargui, čállet ovttasbargoguimmežagat preassadieđáhusas.
Prošekta «Boahttevaš Kárášjohka» vuoruhuvvo 2019-2023 áigodagas. Prošeakta álggahuvvo ollislaš guorahallamiin dearvvašvuođa- ja fuollaossodagas golggotmánus 2019. Ođđa dárbbašlaš doaimmat dearvvašvuođa- ja fuollaossodagas, ja dasto eará ossodagain, dahkko prošeavtta olis.
Sámegiella ja kultuvra
Sámegiella ja kultuvra galgá nanus ja ealli gieldda ovdánahttimis.
– Gielda galgá leat rabas dárogielagiidda ja eará gielagiidda, ja maiddái atnit árvvus eará kultuvrraid. Mii áigut ovddidit máŋggakultuvrralaš birrasa, seammás go Kárášjohka lea lunddolaš guovddážin sámi ásahusaid dáfus, čállet sii.
