Porsáŋggu spábbačiekčit barge nu go háliidedje ja derpe Bossogohpi 4-0 17. čiekčanvuorus Finnmárkku 4. divišuvnnas.
David Koikoi Jallah, Eirik Lund Holm, Tobias Borch ja Per Arne Østgård coggaledje spáppa mollii čiekčamis man Porsáŋgu vuittii 4-0.
Porsáŋgu lea njunnošis ráidočiekčamis ja sis leat 42 čuoggá.
Fállejohka lea nubbin 40 čuoggáin, muhto sii leat čiekčan ovtta čiekčama unnit ja sáhttet mannat Porsáŋggu meaddel jus vuitet čiekčama man eai leat vel čiekčan.
Vuoittáhalle
Nordlys čievččai Guovžajávrri vuostá Niitoguolbanis sotnabeaivvi, ja sii vuoittáhalle čiekčama 2-3.
Ovllaper Skoglund Sara, gii lea boahtán ruoktot Álttá joavkkus, coggalii goappašat moalaid.
Guovžajávrri moallabáhččit ledje Dan Michael Randa (2) ja Martin Vangen Mentyjervi. Nordlys lea buot maŋemusas ráidočiekčamis njeljiin čuoggáin.
Hástaledje politihkkáriid ja vuite
Ovdal čiekčama hástaledje Deanu spábbačiekčit buot listonjunnošiid gielddas boahtit geahččat čiekčama Honnesvági vuostá.
Deanu gánddat časke tabeallaránnjá Hobnnesvági 3-2, maŋŋel go Honnesváhki lei vuoittu bealde 0-2 boddui.
Deatnu lea gávccádin ráidočiekčamis 17 čuoggáin ja Honnesváhki fas ovccádin 16 čuoggáin.
