Lea vuollel vahkku gitta 200 valáštalli ja hárjeheaddjit čavgejit Murmánskii, Ruoššas, gos galget searvat Barents Summer Games gilvvuide.
Barents Games lea valáštallanfestivála gos gaskal 15- ja 25-jahkásaš valáštallit deaivvadit ja gilvvohallet dihto valáštallansurggiin.
Lágideamit bistet olles vahkkoloahpa ja lágiduvvojit juohke nuppi jagi geasse- ja dálvegilvun.
– 30 iešguđetlágan valáštallamat leat mielde Barents-prográmmas, ja lea 15 geassegilvvu ja 15 dálvegilvvu, dieđiha Barents gilvvohallama riikkaidgaskasaš koordináhtor Vera Arntsen preassadieđáhusas.
Golmma valáštallamis mielde
Dán jagi lea guđat geardi go Barentsgilvvut lágiduvvojit, ja dán vuoru lea gilvu Murmánskkas borgemánu 30. beaivvis gitta čakčamánu 1. beaivái. Leat 600 oasseváldi mielde ja sii leat Norggas, Ruoŧas, Suomas ja Ruoššas eret.
Sii gilvalit 11 iešguđetlágan valáštallamiin nu go dávgebáhčimis, boccias, bowlemis, sihkkelastimis, spábbačiekčamis, judos, meahccedádjadeamis, beavdetennisis, tennisis, friddjavaláštallamis ja heaibumis.
– Finnmárkkus servet oasseváldit golmma valáštallamis, mii lea sihkkelastin, spábbačiekčan ja heaibun. Mis lea maid nuorra jođiheaddji mielde, Otilie Næss, gii galgá searvat YLIB prográmmas, mii lea Barentsguovllu nuorra jođiheddjiide, čilge Arntsen.
Ustitvuohta guovddážis
Lea Barents Sport Committee mii eaiggáduššá Barents Games konseapta, ja leat ovddasteaddjit buot njealji riikkas mielde. Barents čállingoddi lea dehálaš ruhtagáldu Barentsgilvvuide.
– Barentsgilvvuin lea maid sadji kultuvrralaš lonohallamiidda ja dahká olbmos olbmui ovttasbarggu vejolažžan. Ustitvuođa ovdánahttin valáštallama bokte Barentsguovllus, lea váldomihttun. Mii galgat gilvvohallat, muhto maiddái oahpásmuvvat nubbi nuppi kultuvrii sihke gilvvohallanšiljus ja rájiid rastá, lohká Arntsen.
Dá oainnát buohkaid namaid geat galget Norgga ovddastit Barents geassegilvvuin:
Olav Verstad – sihkkelastin (jođiheaddji) |
Anne Katja Heiberg – sihkkelastin |
Julia Jonas Andersen – spábbačiekčan |
Nora Manshadi Willassen – spábbačiekčan |
Mika Holmen Hætta – spábbačiekčan |
Emma Kivijervi- spábbačiekčan |
Ronja-Elise Angell Larsen – spábbačiekčan |
Elias Lissner – spábbačiekčan |
Thomas Bjørgve – spábbačiekčan |
Adrian Rollstad Johnsen – spábbačiekčan |
Eirik Frost – meahccedádjadeapmi |
Gard Frost – meahccedádjadeapmi |
Eskil Frischkncht – meahccedádjadeapmi |
Marius Gudbjørnsen Tjelde – heaibun |
Bjørn Nilsen – heaibun |
Frode Gundersen – heaibun |
Ramona Eriksen – heaibun |
Othelie Anette Høie – heaibun |
Viktoria Miriam Øverby – heaibun |
Edvard Wartiainen Rønning – heaibun |
Anatoliy Bogdanov – heaibun |
Marit Olaussen – heaibun |
Kasper Øverby – heaibun |
Anne Therese Eriksen – heaibun |
Otilie Næss – YLIB prográmma |