Plástamoalut goanstarássešilljuin lea nubbin stuorámus gáldu Norggas mii nuoskkida mikroplásttain. Dál áigu Davvi-Norgga SeastinBáŋku 1 bidjat logi miljovnna mainna unnidit plástanuoskkideami.
Plástamoalut goanstarássešilljuin lea nubbin stuorámus gáldu Norggas mii nuoskkida mikroplásttain. Dál áigu Davvi-Norgga SeastinBáŋku 1 bidjat logi miljovnna mainna unnidit plástanuoskkideami.
Stuora oassi ruđas manná spábbačiekčanservviide mat áigot unnidit plástamoaluid Davvi-Norgga goanstarássešiljuin. Birasdirektoráhtta lea lohkan ahte lea vejolaš unnidit dan nuoskkideami 98 proseanttain.
– Mii sáhttit nagodit dan jus mii ovttasbargat, ja dat lea dehálaš bargu. Norgga biraseiseválddit leat rehkenastán ahte plástagranuláhtat goanstarássešiljuin leat nubbin stuorimus mikroplástagáldu Norggas, lohká Davvi-Norgga SeastinBáŋku konseardnadirektevra Petter Høiseth.
Searvvit sáhttet ohcat ruđa dán doibmii
Norgga Spábbačiekčanlihttu ja Davvi-Norgga SeastinBáŋku bovdejit buot Davvi-Norgga spábbačiekčanservviid ja suohkaniid fárrui golmmaoasát bargui movt unnidit plástanuoskkideami.
Vuosttaš oasis lágiduvvojit kurssat iešguđet báikkiin Davvi-Norggas čájehan dihte mii doaibmá doalahit plástagranuláhtaid šiljus. Bajimussii lea čállon ahte fysalaččat sáhttá giddet šilju birra ja gosa sirdá muohttaga. Nubbi doaibma lea hehttet plástamoaluid čuovvut čázi mii golgá eret šiljus. Kummat ja filtarat leat dehálaš reaiddut. Birasdirektoráhtta ja Norgga Spábbačiekčanlihttu ávžžuhit bidjat ristta ja ráidnenbáikki biktasiidda ja skuovaide, vai granuláhtat eai čuovo mielde go olbmot guđđet báikki.
– Dát doaimmat mákset ruđaid, muhto lea buorre go searvvit sáhttet ohcat ruđa dasa Servvodatloktema bokte ollášuhttimii. Dalle álget áššit ovdánit, čuoččuha Høiseth.
