Golggotmánu 1. beaivvi ledje juo 116 dieđihuvvon boahtte jagi Finnmarksløpet beanagilvui.
Čakčamánu 15. beaivvi rahppui dieđiheapmi boahtte jagi Finnmarksløpet beanagilvui. Vai beassá mielde vuorbádeamis vuoitit vuolgganummara, de ferte dieđihan ovdal golggotmánu 1. beaivvi.
– Dábálaččat dieđihit sulli 80 proseantta oassálastiin iežaset juo dan guokte vuosttaš vahkku, vaikko dieđihanáigemearri ii leat ovdal go skábmamánu 30. beaivvi, dieđiha Finnmarksløpet iežaset neahttasiiddus.
38 dieđihuvvon
Dán jagi lea 1200-kilomehter ođas, mii lea boahtán 100-kilomehtera sadjái. Dasa leat juo 38:s dieđihan nohkka árrat ahte leat mielde vuorbádeamis.
Finnmarksløpet Trond Anton Andersen čállá iežaset neahttasiiddus ahte eai goasse ovdal leat ná olu vuoitokandidáhtat leamaš dieđihuvvon dan guhkimus gilvui.
Neahttasiiddus lea Andersen nammadan logi vuoddji geaid oaivvilda šaddat favorihttan guhkimus gilvvus boahtte jagi:
Kristian Walseth, Thomas Wærner, Petter Jahnsen, Arnt Ola Skjerve, Marit Beate Kasin, Ola Brennodden Sunde, Sigrid Ekran, Birgitte Næss, Ralph Johannessen ja Petter Karlsson.
500-kilomehter
500-kilomehteris lea dán jagi vuoiti, Elisabeth Edland, okta dan 69:s geat leat dieđihuvvon.
Vaikko dát geaidnu maid rievdá boahtte jagi, de geahččá Andersen aŋkke Edlanda favorihttan.
– Elisabeth Edland lea álo favorihtta. Sus leat nu olu vuoittut ahte mii lávet juo goasii nammadit su máilmmi buoremus vuoddjin gávcciin beatnagiin.
