Márjjábeivviid oktavuođas lágiduvvo njoarostangilvu, ja dán jagi galget sihke mánát, nuorat, nissonolbmot ja almmáiolbmot gilvalit vuostálaga.
Márjjábeivviid oktavuođas lágiduvvo njoarostangilvu, ja dán jagi galget sihke mánát, nuorat, nissonolbmot ja almmáiolbmot gilvalit vuostálaga.
Heahtá Márjjábeaidoaluin lea guhkes árbevierru, dán jagi lágiduvvojit njukčamánu 23. ja 24. beaivvi.
Vaikke dán jagi eai lágit ge heargevuodjingilvvuid nu mo lávejit, de lágidit goitge Gollegiehta njoarostangilvvu, dasa lassin leat maid čájálmasat ja eahketdoalut Heahtás dieid beivviid.
Buohkat vuostálaga
Dán jagi dattetge šaddá njoarostangilvu veahá eará go diibmá, go leat veahá rievdadan njuolggadusaid.
– Mii leat divvon njuolggadusaid diimmážis, mat leat veahá čielgasabbot go ovdal ja nu galgá šaddat váddásabbon eahpidit lea go rivttes vuoiti ja proteasttaid bidjat, muitala Nils-Samuli Näkkälä lágideddjiid bealis.
Dasa lassin leat maid váldán eret ahkemeari gilvvuin, dasa sáhttet maiddái mánát ja nuorat oassálastit.
– Buohkat gilvalit de vuostálaga, ii leat sierra luohkká mánáide, nuoraide, nissoniidda ja dievdduide. Jáhkán šaddat buorren gilvun, dadjá son.
Son dattetge ii ávžžut menddo smávva mánáid gal searvat gilvui.
Ráhkadan njoarostanmašiinna
Gollegiehta-gilvvus njorostallet lihkadeaddji stoalppuid, seamma ládje go Dávgevári njoarostangilvvuin, ja ođđa njoarostangilvvus mii lágiduvvui Guovdageainnus mannan čavčča.
Näkkäläjärvi muitala ge iežas leamaš mielde ráhkadeamen mašiinna mii jođiha stoalppuid.
– Mun háliidin beassat earálágan gilvvuid lágidit, ja diekkár stoalpput sulastahttet veahá bohcco lihkastemiid ja jáhkán lea suohttaseabbo njoarostit dan, čilge son.
Diibmá jo geavahedje dákkár mašiinna, muhto dainna ii lean lágideaddji áibbas duhtavaš.
– Mii leat divvon mašiinna maid diimmážis, mii ii doaibman nu bures dalle, lohká Näkkälä.
Erenoamáš vuoitu
Dán jagi ii leat vuoitu ge seamma go ovdal, go muđuid láve sis leat ruhtavuoitu.
Dál lea vuoitu baicce erenoamáš muohtaskohter, dahje čakčaskohter, nu mo lágideaddji gohčoda dan.
Ruoššas buvttaduvvon Irbis T150 mállet skohter, man čáhkkeha dábálaš persovdnabiilla maŋábeallái, dat lea vuoitun.
Vuollelis beasat oaidnit filmmaža skohtera birra.
– Eat mii gille juohke jagi ruhtavuoittu bidjat, galgá fuobmát eará maid. Skohter han lea ánolaš diŋga ja danne jurddašeimmet dat lea buorre vuoitu, čilge Näkkälä.
Skohteris lea árvu 3000 euro, mii dahká birrasii 30 000 ruvnno, ja lágideaddji muitala iežas maid geahččalan skohtera:
– Lean geahččalan dan veahá ja lean gullan ahte lea buorre čakčaskohter. In dieđe, muhto ii leat lossat goit, čilge son.
(Ođasmahte siiddu jus video ii iđe dalán)
Vuordá Norgga beale njorostalliid maid
Dál lea birrasii beannot vahkku vel dassái go dieđihanáigemearri dievvá, njukčamánu 24. beaivvi diibmu 16:00.
Lágideaddji lohká jo máŋgalogi olbmo almmuhan iežaset gilvvuide, ja son vuordá eambbosiid vel searvat. Gilvvuide sáhttet buohkat almmuhit.
– Dieđusge sáhttet Norgga beale njorostallit maid searvat. Doppe lávejit boahtit juohke jagi njorostallit, ja Gollegieđat leat leamaš Norgga beale maid, soames vuoittu leat dien beallái ge ribahan, čaibmá Näkkälä.
Rátkkagilvvut álggos
Njoarostangilvvuide sáhttá almmuhit 24.3.2017 diibmu 16:00 (buot áiggit Suoma áiggis) rádjái, čujuhussii: edaminna@gmail.com.
Oassálastinmáksu 50 euro máksojuvvo báikki alde.
Gilvvohallan álgá lávvardaga njukčamánu 25. beaivvi diibmu 12:00 Heahtá skuvlla šiljus, dalle leat vuos rátkkagilvvut.
Sotnabeaivve jotket finálaiguin, mat álget diibmu 12:00.
