Sámediggi háliida bargagoahtet viidáseappot organiseret sámi valáštallama ja lea bovden sámi valáštallanorganisašuvnnaid čoahkkimii.
Sámediggi bovde sámi valáštallanorganisašuvnnaid Sámi Valáštallanlihttu Norggabeale juogus (SVL-N) , Sámi Heargevuodjinlihttu (SHL) ja FA Sámi čoahkkimii Romsii golggotmánu 27. beaivvi, čállá Sámediggi preassadieđáhusastis.
Sámediggi čujuha čoahkkimii mii lei sámi valáštallanorganisašuvnnaiguin Romssas cuoŋománu 22. beaivvi, gos sámi valáštallama organiseren lei fáddán.
Čoahkkima duogáš lei Sámediggeráđi čilgehus mii válbmanii 2015 čavčča.
Sámedikki sávaldat lea oažžut sámi valáštallanorganisašuvnnaid láhčit valáštallanorganiserema dili buoremus lági mielde boahtteáigái.
Vuordámušat
Cuoŋománu čoahkkimis lei ovttaoaivilvuohta ahte Sámediggi gohčču čuovvolančoahkkimii golggotmánus, gos lea vuordámuš ahte juohke organisašuvdna sin siskkáldas proseassaid vuođul, buktá jurdagiid ja evttohusaid sámi valáštallama boahtteáiggi organiseremii.
Konkrehta čovdosii
Sámediggi čállá ahte sin bealis lea dehálaš oažžut sadjái konkrehta čovdosiid buori áiggis, ovdal Sámedikki bušeahttagieđahallama 2017 čavčča.
