-Almmuhus-
-Almmuhus-
-Almmuhus-
VALÁŠTALLAN– Lea leamaš neavrri lossat

– Lea leamaš neavrri lossat

-

-

Mannan vahkkoloahpa oaččui Signe Marie Fidje Store revánšša daid rahčamušaid ovddas maid lea vásihan maŋimuš jagiid, go nagodii kvalifiseret 2016 OG:i.

HEAIBUN

Norggas lea erohus nisson- ja dievdoheaibun vugiin. Nissonat heibot friddjastiilla mielde, dievddut ges aivve greika-romárlaš stiilla mielde. 

 

Friddjastiillas sáhttá geavahit julggiid ja julggiid gaskii čárvet vuostálasti.

 

Greika-romerlaš vuogi mielde ii leat lohpi eará go bajit oasi rupmašis geavahit heaibbodettiin.

 

Riikkaidgaskasaš gilvvuin heibot sihke nissonat ja dievddut friddjastiilla mielde.

– Lei máilmmi somá ja geahpádussan kvalifiseret OG:i. Leat nieidaheaibun Norggas lea rahčamuš jo iešalddis. Mun lean vásihan nu neavrri olu lossa áššiid maŋimuš jagiid ja dovddan ahte lei hirbmat bonus, muitala Signe Marie Fidje Store (20).

 

Beasai finálii ja nu maiddái OG:i

Deanu Heaibunsearvvi heaibu Signe Marie Fidje Store heaibbui lávvardaga Olympiakvalifiserengilvvuin Istanbulas Durkkas, gos nagodii beassat finálii ja nu beassá maid 2016 OG-gilvvuide mat lágiduvvojit Rio de Janeiros, Brasilas. Signe Marie oassálasttii 69 kg deaddoluohkás. 21 heaibu ledje dien deaddoluohkás. Nuppi heaibuma maŋŋil lohká Signe Marie iežas jurddašan ahte sáhttá nagodit vuoitit.

– Mun deaivvadin Ungára nieiddain nuppi vuorus, ja suinna lean ovdal heibon. Son lea gievra ja veahá boarrásat go mun, muhto nagodin su časkit. De jurddašin ahte go suinna birgejin, de gal nagodan daid earáid vuostá maid, muitala Signe Marie.

Son dattetge ii diehtán geainna galggai deaivvadit semifinálas, iige duostan danne ovdagihtii gal ávvudit.

– Mun jurddašin ahte galggan máhtá ala heaibut ja ahte mus galgá leat eambbo miella vuoitit go dan nuppis, ja mun birgejin, muitala Signe Marie.

 

Moaitá Norgga Heaibunlihttu

Ovdal OG-kvalifiseremiid eai leat Deanu nieiddas leamaš aivve čuvges beaivvit. 2012 rádjái ledje su birrasis olu nieidaheaibut, sus lei fásta hárjeheaddji ja visot orui ovdáneamen bures.

– De 2012:s heite eanaš nieiddat, mu hárjeheaddji buohccái, iige nagodan čuovvolit šat mu seamma bures go ovdal, ja mun báhcen dego okto. Dasa lassin lean maiddái buohcan, earret eará mononukleosiin (kyssesyke dárogillii). Nu ahte lean olu rahčan.

Ii son dattetge leat dušše diekkár rahčamiid vásihan. Nu mo álggus namuhii Signe Marie, de lohká ahte Norggas lea lossat leat nissonheaibun.

– Nu mo dál jođihuvvo Norgga Heaibunsearvilihttu, de vuoruhuvvojit dievdoheaibut vuosttamužžan, dat favoriserejuvvojit. Midjiide nieiddaid ii báze mihkkege go bušeahtas vuoruhuvvojit dievddut. Sis šaddá de buorre dilli ja dat gal leage riekta, sis galgá ge buorre dilli. Muhto mađi buoret dilli dievdoheaibuin lea, dađi fuonit dillái gártat mii, muitala Signe Marie.

 

Olu vuoruhan eret

Signe Marie heaibugođii jo nieiddažin, Deanu heaibunsearvvi ovddas, ja mearridii nuorran jo ahte áigu joatkit heaibut ollesolmmožin.

– Mun lean neavrri olu manahan ja vuoruhan eret dán valáštallama ovddas. Studiat šaddet vuordit, sosiála eallima, mii eará mu ahkásaččain lea, vuoruhan eret, earát luomostallet ja mun hárjehalan. Dieđusge lean ieš válljen dán ja háliidan dán, muhto dat lea manaheapmi, čilge son.

Daid áiggiid go sus lea leamaš lossat, de mieđiha ahte jurdagat leat maid leamaš lossadat.

– Daid áigodagaid go lea leamaš lossat, go in lihkostuva ja go vuoittáhalan máŋgii maŋŋálaga, de lean diehttelasat soames geardde jurddašan ahte lea go vuoiga dan veara heaibut šat, muitala son rahpasit.

 

(Ášši joatká gova vuolábealde)


NIEIDDAŽIN JO HEAIBUGOAHTÁN: Signe Marie Fidje Store álggii nieiddažin jo heaibut. Dán govas oaidnit go lei vuoitán muhtin heaibuma 2007:s, dalle lei dušše 11-jahkásaš.
Govven: Deanu heaibunsearvi

 

Maiddái ruđalaččat muitala Signe Marie iežas rahčat.

– Ii leat mihkkege «big businessaid» leat heaibun. Eanaš mu ahkásaččain studerejit ja barget oasseáiggis, ja lohket iežaset leat geafin. Mun, guhte heaibbun, in astta bargat oasseáiggis, ja nu lean baicce geafi. Lea oalle hástalus oažžut árgabeaieallima njuovžat, muitala son ja reaškkiha.

 

Ii duostta einnostit

Borgemánus álget ge Olympiagilvvut Rio de Janeiros Brasilas, ja Signe Marie álgá dál ráhkkanit daidda.

– Mun ferten beassat doarvái olu «sparret» ja dovdat ahte heaibun darvána rupmašii ovdal go dohko vuolggán.

Son ii duostta einnostit mo doppe birge:

– In dieđe mo manaš, dan diehttelasat dieđán buorebut go dat áigi lahkona. Muhto jus dovddan ahte lean doarvái bures bállen ráhkkanit, de gal lean doppe doarrumin medáljaid alde, lohká son.

 

Ovddeš hárjeheaddji illuda

Fidje Store ovddeš hárjeheaddji, Frode Gundersen, čuovui buot heaibumiid maiguin Signe oassálasttii, ruovttus Deanus, ja go de čielggai ahte nieida beassá OG-gilvvuide, de gal boltasedje dovddut hárjeheaddjis.

– Gal dat lei stuorra vásáhus, mus šadde olu dovddut go dieđán man olu son lea rahčan vai lihkostuvašii ja man olu son lea manahan áiggiid mielde.

 

(Ášši joatká gova vuolábealde)


Signe Marie Fidjes Store ovddeš hárjeheaddji, Frode Gundersen, lea ilus go su ovddeš oahppi beassá OG:i.
Vuorkágovva: Tor Einar Schøning, Finnmarken

– Háliidii leat buoret go earát

Ovddeš hárjeheaddji dattetge ii loga gal iežas einnostan dalle go hárjehišgođii Signe Marie, ahte nieida nie guhkás olaha.

– In dan gal oaidnán dalle vuos, dan ii oainne go heaibut leat diekko 13-14-jahkásaččat, go sáhttá olu dáhpáhuvvat das rájes dassái go rávásmuvvet. Muhto mun oidnen ahte lea áŋgir hárjehallat, anii detáljjaid fokusis, čađat háliidii buorebun šaddat ja háliidii leat čeahpit go earát, muitala Gundersen.

16-jahkásažžan álggii Signe Marie Norgga Alladássevaláštallama joatkkaskuvlii.

– Go dohko álggii ,de dihten ahte doppe lea buorre biras, mii váldá vára sus, lohká Gundersen.

 

Norgalaš favorihtta ii beassan OG:i

Signe Marie Fidje Store (20), ii lean áidna norgalaš mannan vahkkoloahpa OG-kvalifiseremis, nuorra nieida Grace Bullen lei maid doppe. Su ledje olusat jáhkkán nagodit beassat OG:i, muhto nu ii mannan.

– Son lea guokte jagi nuorat go Signe, stuorra taleanta, muhto sus lea ođđa vejolašvuohta fas njealji jagi geahčen. Lea olu maid galgá riekta deaivat, vai lihkostuvvá, lohká Gundersen Bullena birra.

Signe Marie ieš ii loga gal alcces váikkuhan go Bullen lei guovddážis ovdal gilvvuid.

– Ádden ahte son lei guovddážis go lea bures birgen dássážii. Iige munnje gal váikkuhan dat moktege, muitala heaibu.

 

Visot vejolaš

Rio OG-gilvvut lágiduvvojit Rio de Janeiros Brasilas, borgemánu 5. beaivvis gitta 21. beaivái. Signe Marie luohkás heibot 16:s. Gundersen ii duostta nu olu einnostit mo Signe Marie doppe birge.

– Buot 16:s háliidit várra medálja, buohkat hárjehallet nu garrasit go nagodit dassážii ja muhtimiidda soaitá dát leat áidna háve eallimis go lea vejolašvuohta fasket OG-medálja, nu šaddá ge garra gilvu. Jáhkán dattetge kvalifiserema addán sutnje jáhku ahte sáhttá birget, ja jus buot lea nu mo galgá ii ge leat bávččagahttán maidege dassážii, de lea visot vejolaš.

 

Signe lea vuosttaš nisu Norggas gii galgá heaibut Norgga ovddas Olympiagilvvuin goassege.

 

 

 

-Almmuhus-