-Almmuhus-
VALÁŠTALLANStuorra njoarostangilvvut álget odne

Stuorra njoarostangilvvut álget odne

-

-

Taigafestivála njoarostangilvvut álget odne Dávgeváris Suomas. Lágideaddjit vurdet vel eanet oasseváldiid go diibmá.

Odne álgá Taigafestivála Dávgeváris, veaháš olggobeale Vuohču Suomas. Dán jagi lágiduvvo dát festivála nuppes, ja nu maiddái njoarostangilvu mii lea oalle bivnnut.

– Njoarostan gilvvuide leat dieđihan birrasiid 60 olbmo ovdalgihtii, ja mii vuordit ain eanet olbmuid dieđihit, muitala okta lágideddjiin, Veera Paakkonen.

 

Gollečoaltu ja njealjejuvllat vuoitun

Njoarostangilvvu vuitiide leat buorit vuoittut. Odne lágiduvvo friddjagilvu, mas vuoitun lea gollečoaltu mas árvu lea 200 Euro.

Ihttin álget ges kvalifiseremat loahppagilvvuide mat leat sotnabeaivvi. Dán gilvvus sáhttá ges vuoitit njealjejuvllaga.

– Dássážii leat jo dieđihan oasseváldit sihke Norgga ja Ruoŧabeale, ja diehttelasat Suomabealde, čilge Paakkonen.

 

Ain sáhttá dieđihit

Gilvvuide sáhttá ain dieđihit, otná gilvvu dieđihanáigemearri dievvá diibmu 17.00 (suomaáiggis) ja gilvvut álget diibmu 18.00.

Ihttin lea maid ain vejolaš dieđihit gilvvuide, mat álget diibmu 12:s (suomaáiggi mielde).

 

Dieđihit sáhttá: vuotsonhurjat@gmail.com bokte

 

Festivála leat maid eahkesdoalut gos earret eará Amoc, Somby ja Rávggon čuojahit.

-Almmuhus-