Ikte šattai deatnulaš Signe Marie Fidje Store Davviriikkalaš meašttir heaibumis Budejjus.
Ikte šattai deatnulaš Signe Marie Fidje Store Davviriikkalaš meašttir heaibumis Budejjus.
Deatnulaš heaibu Signe Marie Fidje Store (19) šattai ikte Davviriikkalaš meašttir heaibumis. Son searvvai senior nissoniid 63 kg luohkás, meašttirvuođagilvvut lágiduvvo Budejjus.
Vuittii vuollel minuvttas
– Signe Marie leai mealgat buoret go earát ja vuittii goappašat heaibunvuoruid ovdal go minuhtta ge lei gollan, čállá su hárjeheaddji Frode Gundersen, Deanu Heaibuidsearvvis, preassadieđáhusa bokte.
Signe Marie vuittii álggos Estlándalačča Anette Traks badjel, dasto biđii son ges ruoŧŧelačča Tilda Tärnkleva badjel ja faskii ge alcces nuppi seniorgolli Davviriikkalaš meašttirvuođagilvvuid oktavuođas.
Norgii báhce gollit
Muđuid faskii várggátlaš heaibu Ramona Eriksen bronssa 48 kg seniornissoniid luohkás.
– Lea mearkkašahttinveara ahte Norga bures birgii nissonsenior luohkáin, čállá Gundersen.
IL Braatt heaibu Silje Kippernes, BK Atlas Grace Bullen, Klæbu BK Ronja Burø ja Deanu Heaibunsearvvi Signe Marie Fidje Store faskejedje buohkat golliid iešguđet luohkáin.
Finnmárkkus ledje golbma nuorraheaibu Davviriikkalaš meašttirvuođagilvvuin. Čáhcesullolaš Anna Pedersen faskii golli, girkonjárgalaš Kaja Bergersen bronssa ja deatnulaš Synne M. Haagensen bođii ges njealjádin.
