Lotnolasvaláštalli Håvard Klemetsen lea mearridan joatkit ainjuo 2 jagi vel lotnolasvaláštallin. Nu ahte MM Lahtis 2017 lea okta 36-jahkásačča mihtuin.
Lotnolasvaláštalli Håvard Klemetsen lea mearridan joatkit ainjuo 2 jagi vel lotnolasvaláštallin. Nu ahte MM Lahtis 2017 lea okta 36-jahkásačča mihtuin.
Håvard Klemetsen (36) šattai Norgga buoremus lotnolasvaláštallin dán dálvve máilmmecupas, gos bođii guđádiin oktiibuot. Dát lea buoremus olahus su áiggis lotnolasvaláštallin. Dál lea guovdageaidnulaš mearredan joatkit vel guokte jagi alimus dási valáštallin.
Joatká
– Mun háliidan joatkit alimus dási valáštallin ođđa ulbmiliid ja nieguid ollašuhttit. Mus lea mokta, ja miella olahit ođđa ovdáneami ja mus lea jáhkku šaddat vel buorebun, dadjá Klemetsen preassadieđáhusa bokte.
Son čujuha dasa go maŋimuš jagi lea leamaš dearvvaš eaige leat leamaš makkárge váttut, dát leamaš dehálaš go galggaš nagodit bissut alla dásis ja vai sáhttá ovdánit.
– Váttuid ja dávddaid haga lea diehttelasat geahppasat olahit mihtuid. Ja dat lea ávkin vai mokta bissu.
Ruovttus doarjja
Klemetsen fárrii mannan čavčča Troanddimis Tromsii, nu beasai Håvard ja su ovttasássi lagabui bearraša dáppe davvin. Dan son oaivvilda leat boahtán buorrin.
– Davvin orrut ii leat mu bealis gal heađuštan mu lávkemis ovddasguvlui. Mun ferten dili oaidnit obbalaččat. Dál asttan eanet ovttastallat bearrašiin, seammás go ollásit ražastan ja fokuseren go lean hárjehallančoahkkanemiin.
Son muitala bearraša dorjon su mearrádusa ahte joatkit valáštallat.
– Ruovttus dorjot mu 100 proseantta dán mearrádusa dáfus, ja dat mearkkaša munnje mearehis olu. Mu biras muđuid maid doarju mu, leat olu davvi olbmot geat čuvvot mu ja lotnolasvaláštallama. Mu birra leat olu áŋgiris olbmot geat addet sihke energiija ja inspirašuvnna, muitala son.
Návddaša alimus dási
Klemetsen mieđiha ahte son návddaša valáštallat alimus dásis, ja oaivvilda leat gudnin beassat valáštallat dán dásis. Muhto dasa adnojit buorit rámmaeavttut.
– Buorit ovttasbargoguoimmi máŋggaid jagiid čađa leat dahkan munnje vejolažžan áŋgiruššat valáštallamii. Buriid ovttasbargoguimmiid haga ii sáhtašii jurddašit ge áŋgiruššat dán dásis, dadjá Klemtsen ja joatká:
– Dasa lassin lean rámis go gulan dákkár superis lotnolasjovkui go dát mii mis lea. Lea movttiidahtti beassat leat mielde ovdánahttimis dákkár birrasa loahpageahčen iežan valáštallanáiggis.
Buorit vásáhusat Lahtis
Håvard Klemetsenas leat buorit vásáhusat Lahtis arenas, dát šaddá ge maid 2017 máilmmimeašttir gilvvuid arenan. Erenoamážit son loaktá dan stuorra njuikenluohkás.
– Mun lean vuoitán guhtta dan maŋimuš čieža njuikemiin dán luohkás, nu ahte doppe gal loavttán bures. Mun lean 38 jagi boaris Lahti MM lágiduvvo, ja muhtimat soitet jurddašit ahte dalle lea menddo boaris jus jurdda lea bures birget internašuvnnalaččat. Muhto go mus leat buorit vásáhusat MM báikkis, riikkajoavku mas lea máilmmi buoremus hárjehallan kultuvra, bearaš mii doarju mu, buorit ovttasbargoguoimmit ja jáhkku ovdánit mii dagaha ahte mun illudan dáid meašttirvuođagilvvuide, dadjá Klemetsen.
