Deatnulaš Kristin Størmer Steira guođđá čuoiganvaláštallama.
Deatnulaš Kristin Størmer Steira guođđá čuoiganvaláštallama.
33-jahkásaš Kristin Størmer Steira heaitá gilvočuoigin, nu dieđiha Norgga čuoiganlihttu preassadieđáhusas.
– Mun lean vásihan viehka olu gilvočuoigin ja mun duođas liikon gilvvohallat čuoiganláhttus, muhto dál lea áigi láddan guorahallagoahtit eará láhttuid, lohká Steira preassadieđáhusas.
Máilmmi- ja olympiameašttir
Kristin Størmer Steira ovddasta IL Forsøk valáštallansearvvi Deanus. Son lea 12 jagi gilvvohallan máilmmi buoremusaid searvvis, ja lea earret eará šaddan golbmii máilmmimeašttirin. Størmer Steiras leat maiddái guokte silbba ja golbma bronsamedálja máilmmimeašttirgilvvuin. Olympiagilvvuin lea fasken ovtta gollu ja ovtta bronsa.
Náitala geasset
Deatnulaš lea guhká árvvoštallan joatká go vai guođđá go valáštallama, muhto ovttasráđiid iežas lagamusaiguin lea mearridan heaitit gilvočuoigin. Kristin Størmer Steira lohká alcces čuvges boahtte áiggi, son áigu vuos čađahit BI-eksámeniid ja geasset náitala Devonin.
– Olahuskultuvrras lean oahppan mo galggan olahit iežan ulbmiliid, ja dás lea ávki boahtte áigái. Lean hui giitevaš go lean beassan ovttasbargan máilmmi buoremus gilvočuigiiguin ja hárjehalliiguin, vaikke muhtimin leamaš duođaid lossa, loahpaha Størmer Steira.