Beaskáđasčuoigamat ávvudit 50 jagi dán sotnabeaivvi. Nils Máhtte ja Julius leaba dan nuppelohkái veterána searvvis, geat badjel 40 gearddi leat čuoigan badjel duoddara, buotlágán dálkkis.
– Gal dat lea oba somá. Lean álo liikon čuoigat ja deaivvadit eará čuigiiguin ja humadit doppe jus lea dilli. Jurddaš go lean nagodan čuoigat 40 geardde juo dán rádjai, dadjá guovdageaidnulaš Nils Mathis N. Sara Ávvirii.
Vajálduhtten sudno
Beaskáđasčuoigamat lágiduvvojit dán sotnabeaivvi, 50. gearddi historjjás. Láhttu lea 28 km Suolovuomis Gargiai. Lágideaddjit ledje ikte stellen ávvudeami sidjiide geat leat čuoigan eambbo go 40 geardde. Sara ja áltálaš Julius Strifeldt eaba lean dohko bovdejuvvon, ja Sara atná dan gal vehá váidalahttin. Muhto beaivvi maŋŋel oaččuiga soai maid vuolgganummariid nugo earát ožžo beaivvi ovdal.
Sara muittaša iluin daid jagiid go lea čuoigan. Vehá leat earáhuvvan maid čuoigamat dan rájes go álge.
– Čuoiganmálle ii leat šat seamma go dološ áiggi lei, dat dábálaš čuoigan. Dál han lea luisten, dadjala son.
Movttáskii mannan vahkkoloahpa
Nils Máhtte lea oktii vuoitán goalmmát saji iežas klássa Beaskáđasčuoigamiin, ja muitá ahte dalle son čuoiggai vel ruovttoluotta Suolovuopmái, oktan eamidiin. Muhto dál ii loga šat áigut jur nu garrasit čuoigat.
– Mii hal gal ferte čuoigat iežamet leahtuin, boagusta son. Muhto vaikko vikkaha iežas measta boarisin, de boahtá goitge ovdan son lea ain sávri čuoigat go bures birgii 30 km Saami Ski Race gilvvuin mannan vahkkoloahpa.
– Mun lean gal hárjehallan Beaskáđasčuoigamiidda dán dálvvi. Dál mannan vahkkoloahpa vel oidnen ahte mun dat goit lean ain buorre čuoigat, go Saami Ski Races bohten 14. sadjái oktiibuot 95 čuoigis, muitala Nils Máhtte.
Gállán jogažiid
Son muitá ahte dan 40 gearddis go lea čuoigan, leat leamaš iešguđetlágán siivvut.
– Leat leamaš njázut, mii leat gállán jogažiid rastá sabehiiguin, muhto dalle maid lágiduvvui gilvu. Dán áigge gal baicca orrot šaddan hui ránttot, go galgá nu goikkis. Go veháge soavlli oaidnit, de ballát. Biegga lea maid dehálaš ja mun lean dál diŋgon juogo nuortaluládaga, orjješluládaga dahje njuolggo luládaga, ja jáhkán dat veahkeha min, leaikkastallá son.
Golbmii ii leat heiven
Áltálaš Julius Strifeldt (72) lea ges čuoigaleame 47. gearddi badjel Beaskáđđasa, ja lea muhtomin vuoitán maid iežas klássa. Dál gal lea lášmmohallanklássii dieđihan.
– Lean manahan čuoigamiid golmma háve, dalle 1966:s go ledjen mearas, 1977:s go ledjen skuvllas lulde ja 1980:s go ledjen konfirmašuvnnain Honesvágis, muitala son.
Dálkkit ja fierttut
Strifeldt lea maid sávrres čuoigi ja čuoiggai sotnabeaivvi 50 km Saami Ski Races, áiggiin 3:13:01. Son čuoigá juohke beaivvi Amtmannsnes lahtus. Son muittaša maid olu iešguđetlágán dálkkiid lea vásihan Beaskáđđasa nalde.
– Muittán 40 jagi áigi lei mus 12 jahkásaš nieiddaš mielde, ja lei nu dálki dalle ahte eat oaidnán báljo dihkáid ge. Muhto eanas gal leamaš fiertu, muittaša Julius Strifeldt.
Lágideaddji muitala ahte oktiibuot 26 olbmo leat čuoigan eambbo go 40 gearddi. Ja sotnabeaivvi čuoigalit gaskkal 16-18 dán veteránas fas oahpes lahtu mielde duoddara badjel.
