Guovdageainnus áigot báhčigoahtit sámi dávggiin ja leat dál beassan mielde Norgga Dávgebáhččisearvái.
Guovdageainnus áigot báhčigoahtit sámi dávggiin ja leat dál beassan mielde Norgga Dávgebáhččisearvái.
Norgga dávgebáhččisearvvis illudit go leat Guovdageainnu Pistovlasearvvi ožžon miellahttun.
Pistovlasearvvi álggahuvvui 90-logus, muhto nogai ovdal go fas mannan čavčča álge. Jođiheaddji lea Manuel Johansen ja searvi gullá Romssa Dávgebáhččiid guvlui. Lagamus dávgebáhčči searvi Guovdageainnus lea Álttá Sportsskytterklubb.
Ávvir lea duvle čállán pistovlasearvvi birra go áigot álggahit dávgebáhčima maid.
– Mii leat logenáre olbmo leamaš geat leat álggu rájes báhčán pistovllain, ja dál leat mis badjel 40 miellahtu juohke agis, nu ahte lea stuora beroštupmi. Dan 35 jagi go lean orron Guovdageainnus, de lean vuohttán jus dáppe lea juoga masa lea beroštupmi, de lea báhčit. Dáppe leat buorit báhččit, leažžá dal hávláriin dahje luođđabissuin, lohká Johansen.
Iežaset dávgi
Nu leage ođđa searvi ožžon jearaldagaid álggahit dávggiin báhčit. Sii leat veaháš iskan makkár dávggit heiveše sidjiide ja searvi de jurddii sámiin lea gávdnon alddiineaset dávgi, ja manne ii álgit dainna.
– Eat mii ieža dieđe olus sámi dávggiid birra, nu ahte mii leat leamaš oktavuođas guoktásiin geat doallaba kurssa sámi dávggi dahkamis. De leage jurdda oahppat ieža dahkat dávggiid, ja nu oahppat báhčit ja gilvvohallagoahtit, lohká Johansen.
Ođđa valáštallansuorgi
Pistovlasearvvis livččii maid hállu ovttasbargat Kárášjogain, ja doppe maid oažžut johtui seamma.
– Mis livččii niehku ahte sámi dávgebáhčin sáhtašii šaddat ođđa sámi valáštallansuorgin, lohká Johansen. Son muitala pistovlasearvvi ja dávgebáhčima gullat goabbat lihttui, muhto goappašagat gullaba Norgga valáštallanlihttui.
– Goappaš suorggit leat stuora valáštallamat riikagaskasaččat, ja fertege muitit dat lea valáštallan, iige bivdoulbmilin, go dávggiin ja pistovllain ii leat lohpi bivdit Norggas, lohká Johansen. Son čilge maid ahte buohkat čađahit miellahttun álggos oanehis sihkarvuođakurssa, go bážidettiin ii ábut duhkoraddat.
