Mánát lášmmohallet skuvlaáiggis miehtá Norgga.
Mánát lášmmohallet skuvlaáiggis miehtá Norgga.
Nášunála álbmotdearvvašvuohta bijai ikte johtui njuikungilvvu miehtá Norgga. Badjel bealli Norgga mánáidskuvllain servet gilvui mii gohčoduvvo “Hopp for hjertet” (sámás: Njuikko váimmu ovddas).
42 skuvlla Finnmárkkus servet gilvui mii galgá mánáid movttiidahttit eanet lihkadit beaivválaččat skuvllas.
Nášunála álbmotdearvvašvuođa generálačálli Lisbet Rugtvedt lea rámis dáinna njuikungilvvuin go lea 10 jagi ávvudeapmi dán jagi, ja lihkadeapmi skuvllas lea šaddan eanet áigeguovdil dál. Oahppit ožžot álkis lášmmohallandoaimma, dan seammás go muittuhit skuvllaid man dehálaš lea lihkadit dearvvašvuođa ja oahppama dihte.
Ovtta diimmu juohke beaivvi
Jaska čohkkát lea šaddan váttisvuohtan dearvvašvuhtii Norggas, maiddái nuorra olbmuid gaskas. Lea dehálaš eastadit buozalmasvuođaid, ja sáhttá maid buoridit olahusa skuvllas ja sosiálalaččat klássalanjas.
– Mihttu lea ahte buot oahppit galggaše diimmu lihkadit juohke beaivvi, lohká Rugtvedt preassadieđáhusas.
Vuoittut
Válljejuvvo vuoiti gii oažžu 10 000 ruvnno klássa kontui. Juohke fylkkas válljejuvvo vuoiti gii oažžu vuoittu klássii. Muđui juhket muhtin lášmmohallanrusttegiid sierra vuoitun.
Dás gávnnat dieđuid guđe skuvllat servet dán gilvui Finnmárkkus (NTB).
