Unnit ja unnit váhnemat lohket jitnosit mánáidasaset. Girjelohkkiid lohku álbmogis njiedjá, čájeha 2024 Lohkkiidiskkadeapmi.
2024 lohkkiidiskkadeami bohtosat almmuhuvvojit Máilmmi girjebeaivvi, mii lea cuoŋománu 23. beaivvi. Lohkkiidiskkadeami leat Forleggerforeningen ja Bokhandlerforeningen čađahan 1977 rájes. Dán jagi čađahuvvui iskkadeapmi 17. geardde.
– Lohkkiidiskkadeapmi duođašta ahte mii dárbbašit nanosmahttit lohkama, dadjaba Forleggerforeningena Trine Skei Grande ja Bokhandlerforeningena Anne Schiøtz preassadieđáhusas.
Iskkadeapmi čájeha ahte okta njealji váhnemis ii loga goassege jitnosit iežas mánáide. Erohusat mánáid gaskkas lassánit. 2017 vástidedje 93 proseantta ahte sii lohket mánáide, 2023 lohku lea 75 proseantta.
