Riddu Riđu geahččit besset Gabba joavkku vásihit dán jagi festiválas.
Gabba álggaha juo čuojaheami Riddu Riđu ovddas, go čuojahit Riddu Riđu kick-off lágideamis, gos Riddu ovdanbuktá buot artisttaid geat galget geasset čuojahit festiválas.
Festiválahoavda Sajje Solbakk lohká ahte Gabba lea okta dain ovdáneaddjimus čuojahanjoavkkuin Sámis justa dál. Sin musihkas oažžut áibbas erenoamáš musihkalaš mystihka ja čehppodaga.
Don bovdejuvvot musihkalaš mátkái árbevirolaš luđiin, roavva gitárain ja čavga bassalinnjáiguin. Don dovddat ahte álgoálbmogiid fámut leat bures heivejuvvon ođđaáigásaš musihkain ja čáffadis duottar-bluesain. Riddu-guossit besset dál juo illudišgoahtit.
Riddu Riđđu festivála lágiduvvo Gáivuonas suoidnemánu 10. beaivvis gitta 13. beaivái.
Dán rádjái leat duođaštuvvon artisttat: Ella Marie Hætta Isaksen, Kanadajoavku The Trade-Offs ja dál Gabba.
