Cuoŋománu 26. beaivi lea beaivi go almmuhuvvojit Ovttastuvvon sisaváldima ohcciid logut. Dat movttiidahttit Norgga árktalaš universitehta (UiT) go ollugat vuoruhit sin bajimužžii.
9077 ohcci leat bidjan UiT bajimužžii oahppofálaldatlisttus čakčaoahpuid oktavuođas. Dat lea 4,9 proseantta eanet go jagi ovdal.
– UiT áddejuvvo oahppoinstitušuvdnan mii fállá relevánta oahppofálaldagaid, leaš dal njuolga maŋŋel joatkkaskuvlla dahje háliidivččii váldit lassioahpu maŋŋelaš iežas karriearas, dadjá Kathrine Tveiterås.
UiT:s leat 11 oahppobáikki Davvi-Norggas, Muoffies lulde gitta Longyearbyenii davvin ja Girkonjárggas nuortan. Earet Romssa de leat golbma stuorimus oahppobáikki Álttás, Hársttáin ja Narviikkas.
Sámi oahput leat bivnnut
Ovttastuvvon sisaváldima logut čájehit ahte ollugat vuoruhit UiT sámi oahppofálaldagaid.
– Sámegiela álgokursii mis ledje 47 ohcci maŋimuš sisaváldimis, 2022:s. Dán jagi mis leat 87 ohcci geat leat bidjan oahppofálaldaga bajimužžii. Dat lea 85 proseantta lassáneapmi. Oahpus leat 30 oahpposaji. Dat lea oahppofálaldat masa mis leat eanemus ohccit oahpposajiid ektui. Seammás mis lea masteroahppu sámegielas ja girjjálašvuođas maid leat 16 ohcci bidjan bajimužžii. Das lea 10 ohcci lassáneapmi diimmážis, muitala UiT prorektor preassadieđu bokte.
Eará bivnnuhis oahput
Álttá campusis hálddašuvvojit muhtun ráje bivnnuhis neahttavuođot oahppofálaldagat. Dasa lassin máŋgasat vuoruhit bacheloroahpu sosiála barggus – 75 ohcci, mii lea 56 proseantta eanet go diibmá.
Narviikkas ges leat inšenevraoahput bivnnuhat ohcciid gaskkas. Bachelor inšenevraohppui, satelihttateknologiijaoahppui lea 53 proseantta lassáneapmi.
Hársttáid mánáidsuodjalusa bachelorohppui lea 44 proseantta lassáneapmi.
Divššároahpu logut lassánit – oahpaheaddjeoahpu logut njidjet
Divššároahppofálaldagaide lea 13,1 proseantta lassáneapmi. Riikaviidosaččat leat 10,3 proseantta ohcciin vuoruhan dan oahpu. Bachelor divššaroahpu logut Hámmerfeasttas leat lassánan 60 proseanttain diimmážis.
– Lea hui buorre go ohcciidlogut lassánit divššároahpuide. Dan mii dárbbašit vai sáhttit oahpahit dearvvašvuođabargiid geat dárbbašuvvojit servodagas, dadjá Tveiterås.
Oahpaheaddjeoahpus dattetge eai leat nu buorit logut ahte sáhttet illudit. UiT registrere 13 proseantta njiedjama jus buohtastahttá diimmá loguiguin. Riikaviidosaččat lea 4,2 proseantta njiedjan.
Čavčča rájes álggaha UiT áibbas ođđa vuođđoskuvlaoahpaheaddjeoahpu Narviikkas. 53 ohcci leat vuoruhan dan, ja galget gilvalit 30 oahppasaji alde.
– Maŋimuš golmma jagis mii leat váldán sisa 1.–7. luohkáid vuođđoskuvlaoahpaheaddjeohppui Hársttáin ja Finnsnesas, ja dál álgit Narviikkas. Leat buorit logut buot golbma jagi, lohká Tveiterås.
