Sámedikki girjerádju, Juoigiid Searvi ja Norgga mánáidgirjeinstituhtta sávvet bures boahtima rabas seminárii sámi mánáidgirjjálašvuođa birra, cuoŋománu 25. beaivvi, Nationálagirjerádjosis.
Leaba Liv Inger Lindi ja Kristin Ørjasæter geat láidesteaba seminára.
Semináras jerret movt njálmmálaš árbevierru lea váikkuhan sámi mánáid- ja nuoraidgirjjálašvuhtii, nu go dat dál lea. Dasa lassin jerret maid lea go dáruiduhttin mearkkašan sámi mánáid- ja nuoraidgirjjálašvuhtii, ja movt lea sámi mánáid- ja nuoraidgirjjálašvuođa gaskavuohta eará mediaide ja dáidda- ja kulturovdanbuktimiidda.
Seminára lea duorastaga diibmu 09:00 – 15:45, Nationálagirjerádjosis. Dieđihanáigemearri seminárii lea loahpahuvvon, muhto oasit semináras rávdnjejuvvojit Norsk barnebokinstitutt siiddus.
Seminárii earret eará boahtiba sámediggeráđđi Maja Kristine Jåma ja Kulturdepartemeantta stáhtačálli Even A. Hagen.
Girjjálašvuođas bohtet UiT universitehtalektor Lisa Monica Aslaksen, girječálli ja dáiddár Sissel Horndal, juoigi ja muitaleaddji Cecilia Persson, girječálli Mary Ailonieida Sombán Mari, girječálli Ante Mikkel Gaup, girječálli ja juoigi Karen Anne Buljo.
Dasa lassin lágiduvvo panelaságástallan ovttas Sigmund Løvåseniin, Karen Anne Buljoin ja Marit Alette Utsiin. Digaštallama jođiha Nisrin Maktabi-Barkouki.
