Dál lea čielgan geat besset dán jagi Sámi Grand Prixii (SGP) searvat, mii lágiduvvo Guovdageainnus beassášlávvordaga.
SGP lágiduvvo dán jagi 30. geardde. Dan rájes go vuosttaš geardde lágiiduvvui 1990:s, de lea SGP leamaš bivnnuheamos dáhpáhus Guovdageainnus beassážiid.
– Mii leat rápmásat almmuhit dán jagaš Sámi Grand Prix oasseváldiid lávlunoasis ja juoiganoasis. Miehtá sámi ledje sádden olu buriid lávlagiid ja luđiid. Oasseváldit dán jagi leat eret oarjánsámis gitta nuorttimus sámis ja mii boahtit beassat gullat sihke luođi, livđe ja le’udd ja oarján-, julev, davvi, anárlaš, skoalta- ja gildinsámegiela lávddenalde Báktehárjjis Guovdageainnuis beassášlávvordaga, dieđiha Sámi Musihkkafestiválahoavda Ken Are Bongo preassadieđáhusas.
SGP 2019 lávlunoasi oasseváldit leat:
Anna Lumikivi – Mõõn tiõrvân
Anna Lumikivi lea Avvilis eret ja lea olu bargan dološ le’udd lávdde nalde leamaš ja earret eará Suõmmkar joavkkuin. Iežas dahkkon lávlagiin lea dál vuosttaš geardde mielde Sámi Grand Prixas.
Kalle Urheim – Don besset jođášit
Kalle lea Julevsámi guovllus Strávnjunnjes eret ja lea ovdal oasálastán Sámi Grand Prixas. Son sihke čállá ja lávlu julevsámegillii ja lea almmuhan Ruodju albuma 2016:s. Dál lea mielde lávlagiin masa leaba Emil Bekkevollain dahkan šuoŋa ja masa ieš lea čállán sániid.
Marina Grinchuk – It happened
Marina lea Lujávrris eret ja lávlu gildinsámegillii lávlaga man Alena Sidorenko lea čállán ja masa Igor Telishev lea dahkan šuoŋa.
EiRA – Eallin lea dál
EiRA joavku boahtá Ráissas ja leaba Anne I. Lilleng ja Marit E. Eira.
Saara Hermansson – Mov laavlome
Saara oasálasttii vuosttaš geardde diibmá ja dál lea Oarjánsámi nieida Stornäs ja Klimpfjell guovllus nuppes mielde lávlagiin man ieš lea dahkan.
Sunna Máret Utsi – Amas geaidnu
Sunna lea Guovdageainnus eret ja lea mielde iežas dahkkon lávlagiin. Mii leat oaidnán su lávdde alde musihkainis maŋemus áiggiid ja fas illudit oaidnit su ja buot eará lávlunoasi artisttaid Sámi Grand Prix lávdde nalde.
SGP 2019 juoiganoasi oasseváldit:
Hanna-Maari Kiprianoff – FeklaMäärjäz
Hanna-Maari lea Čeavetjávrris eret ja le’udd lea dan birra mot máttut ellet min luhtte vaikko máilbmi rievdá.
Hans Ole Eira – Laila Kristine
Diimmá vuoiti Hánske Niillasa Hans Ole Mázes eret oasálastá dán jagi Laila Kristine luđiin man ieš lea bidjan.
Heli Aikio – Lyemeákku
Anáraš Piätárii Kaabi Isá Ooni Heli oasálastá livđiin man ieš lea bidjan.
Anfisa Agejeva og Domna Khomjuk – Vuess
Zaharov-oappážagat Anfisa ja Domna Lujávrris eret leu`ddeba fárrolaga iežaska guovllu leu’dd Vuess masa leaba bidjan dajahusaid.
Mathis A. Oskal – Anna Christina
Máhte Ántte Máhtte Heammogiettis, Guovdageainnus eret, lea olu leamaš mielde SGP:s ja dán jagi oasálastá iežas dahkan luđiin.
Mikkel Per Sara – Tone
Máját Niillas Niillasa ja Joavn-Elle Mihkkal Biera Mázes eret orru Borkenesas ja boahtá Guovdageidnui iežas dahkan luđiin Giehtavuona nissonii.
Nils Peder Gaup – Elle Gárena luohti
Iŋgor Ántte Nils Pedar Guovdageainnus eret luohtedahkki ja dajahalli luođis.
Per Bueng – Per Helge
Lemet Niillasa Biera Gárggoluobbalis eret lea ristbárdnásis bidjan luođi.
Per Henrik Eira – Piera Joavnna
Hánske Niillasa Per Henrik Mázes eret oasálastá iežas dahkkon luđiin.
Kim Hallgeir Berg
Hálgon lea oasálasttán máŋgii ovdal SGP:i.