Sámediggeráđđi lea juolludan 345 450 ruvnno doarjjan RidduDuottarMuseat go áigot oastit XRF-mášiinna.
Dát mašiidna galgá geavahuvvot iskat dávviriid mat máhcahuvvoje sámi museaide Bååstede-prošeavtta bokte. Dávvirat mat máhcahuvvoje sámi museaide eai leat iskkaduvvon pesticid ektui. Okta XRF-mašiidna nagoda muitalit eahpeorgánalaš peticid, ovdamearkka dihte eallisilba dahje arsenihkka mii lea olu geavahuvvon divrevuosttaldeapmái museain sihke norggabeale ja olgoriikkain.
Store Norske Leksikon dieđuid mielde leat pesticid:as kemihkalaš gaskaoamit vahátlaš organismmaid vuostá, mat muosehuhttimin čákŋet šattuide, vissui ja ruktui, dávvirvuorkái, tekstiillaide, ja nu viidáset.
– Dát lea dehálaš háhkamuš museasiidii. Mašiinnain nagoda buorebut dustet ja suddjet sámi museadávviriid dan ektui ahte nagoda fuomášit mirkkuid mat sáhttet billistit divrras sámi kulturdávviriid, ja nagoda gieđahallat daid vuoi bistet guhkit, cealká sámediggeráđđeláhttu Maja Kristine Jåma (NSR)
