Duorastaga iđida almmuha NVE geat leat ohcan elfápmoprošeavttaid Finnmárkkus áigemeari siste.
NVE (Norggačázádat- ja energiijadirektoráhtta) almmuha cuoŋománu 25. beaivvi tiibmu 08.00 listtu mii čájeha geat ohce elfápmoprošeavttaid Finnmárkkus ovdal áigemeari 22.04.2024.
Dat listu almmuhuvvo NVE neahttasiiddus, dieđiha NVE preassadieđáhusas. Seamma beaivvi lágiduvvo diehtojuohkinčoahkkin tiibmu 09.00 ja lea rabas buohkaide.
Duogáš dasa: 2023 borgemánu almmuhii ráđđehus elfápmo- ja industriijaloktema, ja bivddii NVE vuoruhit Finnmárkku elfápmoprošeavttaid konsešuvnna meannudeami. NVE oaččui iešguđet aktevrrain rávvaga oktasaččat buot elfápmoprošeavttaid meannudit, dan sadjái go ovttaid mielde.
Elfápmofierpmádagas lea unnán sadji ja dat dagaha ahte ii leat vejolaš go moadde ođđa elfápmoprošeavtta hukset fylkkas. Danin háliida NVE nu árrat go vejolaš vuoruhit guđemuš prošeavttaid sii sáddejit gulaskuddamii ja maid sii meannudit dán vuoru. Dat geahpeda gulaskuddanbeliid bargonoađi ja beavttalmahttá proseassa buohkaide.
