Beardu, Málátvuomi, Siellakvuona ja Báhccavuota gielddaid vuovddit galget dál kártejuvvot. Romssa ja Finnmárkku stáhtahálddašeaddji bivdá vuovdeeaiggádiid, geat háliidit vuovdedoalloplána iežaset giddodahkii, iežaset dieđihit prošektii.
Romssa ja Finnmárkku stáhtahálddašeaddji čállá preassadieđáhusas ahte Gaska-Romssas lea biddjojuvvon johtui oktasaš vuovdedoalloplánaprošeakta.
Jus prošeakta manná nu mo lea plánejuvvon, de ožžot Beardu, Málatvuomi, Siellakvuona ja Báhccavuona gielddaid vuovdeeaiggádat fálaldaga tiŋgot iežaset giddodahkii vuovdedoalloplána.
Ođđa vuovdedoalloplánat addet vuovdeeaiggádii ođasmahtton dieđuid makkár vuovde- ja birasriggodagat gávdnojit giddodagas. Dasa lassin ožžot maid evttohusa mo berrešii giddodaga áimmahuššat ekonomalaš ja birasustitlaš vugiin.
Vuovdedoalloplána lea vuođđu buot plánejuvvon jja dehálaš doaimmaid čađahemiide vuovddis, nu go muorračuollan, ođđasit gilvit, vesávuovddi dikšun ja geaidnohuksen. Dasa lassin maiddái birasdárbbuid áimmahuššat.
