In doarjjo Suoma beale Sámedikki ođasmahttojuvvon válggaid boikoterema. Geahča maid Iisku-Máhte ja Čiskke-Ánne-Máreha Biret čállá dán čállosis:
Professor Fierranjot Kirstte Rávdná, Rauna Kuokkanen, ávžžuha boikoteret Suoma Sámedikki ođasmahttojuvvon válggaid (Ávvir 11.4.2024). In doarjjo Suoma Sámedikki ođasmahttojuvvon válggaid boikoterema.
Anan stuorra árvvus professor Kuokkanen dutkanbarggu eamiálbmotrivttiin ja maiddái su čiekŋalis analysa Ávviris. Dilli Suoma bealde lea skandála ja lea buorre, ahte ášši čalmmustahttojuvvo.
Ii leat riekta, ahte Suoma alimus hálddahusriekti (AHR) luoitá Suoma Sámedikki válgalogahallamii olbmuid, geat eai deavdde jienastanrievtti kriteraid. Sámedikkit leat sámiid várás.
Ávžžuhan buot sápmelaččaid jienastit ođđa válggain 1.–30.6.2024. Dáid válggain lea hui dehálaš, ahte juohke sápmelaš jienasta ja fuolaha, ahte buot su lagašolbmot maid jienastit. Mii galgat ovttas suodjalit min sámi demokratiija sisabahkkemiid vuostá.
Mis lea riekti iežamet álbmotválljenorgánaide. Mii leat soahpan stáhtaiguin, ahte dálá dilis dat leat Sámedikkit Suoma, Norgga ja Ruoŧa bealde sihke nuortalaččaid giličoahkkin.
Sámit Suoma bealde leat bargan badjel 50 jagi huksen dihte iežaset álbmotválljenorgána. Mii galgat gudnejahttit dán barggu. Dál ii leat áigi vuollánit.
Mis lea riekti doallat Suoma Sámedikki nannosit sámiid gieđain ja dan mii galgat dahkat. Ii gánnet ribahit Suoma Sámedikki olggobeale olbmuid háldui!
