-Almmuhus-
Beassážat 2024Dál lea 50 jagi dan rájes go ođđa girku gárvánii 

Dál lea 50 jagi dan rájes go ođđa girku gárvánii 

-

-

Dáid beassážiid áigot veháš ávvudit Kárášjogas, go lea 50 jagi áigi go ođđa girku gárvánii ja váldui atnui.

Pálbmasotnabeaivvi 7. beaivvi cuoŋománu 1974:s lei historjjá vuosttaš ipmilbálvalus Kárášjoga ođđa girkus.

Kárášjoga girkoverdde Ulf West muitala ahte dáid beassážiid, nuppi beassášbeaivvi, cuoŋománu 1. beaivvi áigot Kárášjoga girkus maŋŋel ipmilbálvalusa doallat vel čoagganeami mas muitalit girku historjjá birra.  

– Mis leat vehá doalut maŋŋel ipmilbálvalusa, gos ságastallat dan birra. Alf Tellefsen boahtá muitalit olles proseassa birra dan rájes go plánegohte ođđa girku dassážii go gárvánii. Boares girku lei dalle šaddan menddo unni ja danne dárbbašedje ođđa girku. Boares girkus han eai leat eambbo 140  čohkkánsaji, ja ođđa girkus leat ges váile 500, muitala West.

Son muitala ahte 1979 rahpasii girkus vel hálddahusoassi, ja nu čohkkejuvvui buot ovtta sadjái.

Ulf West lohká ávvudeamis áigut čájehit govaid, olbmot besset gullat girku birra, ja sii guossohit gáfe ja gáhku. 

Girkostallama lohká son ain dehálažžan sihke Guovdageainnus ja Kárášjogas beassážiid áigge.

– Dán guovtti báikkis gal leat ain olu olbmot geat girkostallet beassážiid. Ja leat maid leamaš olu ipmilbálvalusat ovdal beassážiid, nugo konfirmašunipmilbálvalusat. Beassážiid leat ipmilbálvalusat buot  bassebeivviid skilleduorastaga rájes gitta nuppi beassášbeaivái, dadjá girkoverdde Ulf West. 

-Almmuhus-