Várre guovvamánu 4. - 5. beivviid 2020, go dalle lágiduvvojit Šoop Šoop - Sámi Design Days 2020 Romssas.
Šoop Šoop galgá leat ođđa arena Sámi designa várás ja deaivvadanbáiki designeriidda, buvttadeddjiide, árbevirolaš duojáriidda ja ostiide, čállá Sámediggi preassadieđáhusas.
– Mii fertet buktit eanet sámi buktagiid olbmuid olámuddui, go čájehuvvo ahte lea dárbu. Dasto galgat mii juohkit máhtu sámi kultuvrra birra, dadjá sámediggeráđđi Silje Karine Muotka preassadieđáhusas.
Arena gos čájehit sámi designa
Šoop Šoop – Sámi Design Days bistet guokte beaivvi.
Vuosttaš beaivvi, guovvamánu 4. beaivvi, deaivvadit sámi designerat ja buvttadeaddjit ostiiguin mat leat bivttasmohtabuvddat, interiørfitnodagat, galleriijat, museat jna.
Nuppi beaivvi, guovvamánu 5. beaivvi, deaivvadit sámi fitnodagat kunddáriiguin.
Dát lea buvttadeddjiid arena, gos besset čájehit márkaniidda mat mannet guhkkelii go báikkálaš márkanat, geaidda eanemusat vuvdet.0
Dát rahpa maid vejolašvuođa čájehit sámi dávviriid ja buktagiid olggobeallai Sámi.
Kunddáriin lea vejolašvuohta gávppašit sámi buktagiid maid váillahit olggobealde turistabuvddaid, gos dávjá oaidnit juovlanigáid ja stáluid.
– Lea hui buorre čohkket buriid buktagiid sámi designmeassuide ja maiddái buorre vejolašvuohta olahit máilbmái. Deaŧalaš lea ahte sámi designerat/duojárat válljejit dihtomielalaččat gos ja guđe oktavuođain čájehit iežaset buktagiid, dadjá duojár Ove Stødle, Billávuonas eret, preassadieđáhusas maid Sámediggi lea sádden.
Buktit sámi buktagiid eanet olámuddui
Dan seammás go sámi gullevašvuohta ahtanuššá fárrolaga sámi kultuvrra eanet dohkkehemiin ja lea eanet oidnosis, erenoamážit TV:s ja musihkkalávddis, de ahtanuššá maiddái čeavláivuohta guoddit sámi identitehtadovdomearkkaid nugo biktasiin, čiŋain dahje stohpogálvvuin.
– Lea paradoksa ahte báikkálaš sámi designeriid ja buvttadeddjiid kvalitehtabuktagat Norggas eai leat olámuttus álbmogii ja buvddaide miehtá riikka. Dál lea duođai áigi ásahit ámmátlaš arena man bokte sámi design ja kvalitehtaduodji boahtá olámuddui buot buvddaide ja ostiide, dadjá sámediggeráđđi Silje Karine Muotka.
Galgá addit máhtu ja áddejumi
Šoop Šoop 2020 galgá maiddái váikkuhit dan ahte buvttadeaddjit ja oastit ožžot máhtu sámi identitehta ja kultuvrra hálddašeamis gávpeoktavuođas.
Dát mearkkaša dan ahte ferte leat áddejupmi das ahte sámi kulturdovdomearkkat galget ovddiduvvot gudnejahttimiin, ovdamearkka dihtii ahte árbevirolaš gávttit čuvvot bearraša ja kulturgullevašvuođa ja sámi designobjeavttat nugo šearffat, biktasat ja čiŋat leat buohkaid olámuttus.
Dat galgá addit máhtu buvddaide ja ostiide, geat soitet ballat oastimis sámi dávviriid go ballet dahkamis juoga «boastut».
Seammás galgá váikkuhit dasa ahte sámi designbuvttadeaddjit galget rámisvuođain sáhttit oaidnit iežaset gálvvuid geavahuvvot kulturrájáid rastá.
Sámediggi lea bivdán Árvu, Være ja Kreativ Industri ovddidit Šoop Šoop 2020.
Dáin fitnodagain lea nana faggi sihke designfágas ja lea nana gullevašvuohta sámi identitehtii ja kultuvrii.
