Seavdnjadasas lea dehálaš oidnot ja oaidnit. Go leat sihkkelastti, dahje geavahat čiekčansihkkela, de leat muhtin njuolggadusat movt geavahit čuovggaid.
Lea bákkolaš ahte leat čuovggat sihke ovddabeale ja maŋábeale sihkkela, muhto eanaš sihkkeliid vuvdet čuovggaid haga.
Juohke sihkkelastti ferte ieš háhkat rusttegiid sihkkelii, ja sihkkelis galget leat šleđggonat pedálain ja sihkkela maŋábeale.
– Ii leat dohkálaš dušše geavahit oaivečuovgga. Jus politiijat bissehit du čuovgga haga, de lea sáhkku 1200 ruvnno (politiet.no dieđuid vuođul), lohká Stáhta geaidnodoaimmahaga jurista Kurt Ottesen.
Ávžžuhit jierpmálaččat jurddašit
– Eai leat njuolggadusat mat mearridit man garra čuovga galgá sihkkelis leat, nu ahte ávžžuhit jierpmálaččat jurddašit. Ale bija beare garra čuovgga, go de earáid čalmmit geđđot, dadjá Ottesen.
Son lohká maid ahte čiekčansihkkeliin ja eará elektrovnnalaš vuojániin galget leat čuovggat.
Čuovggaid sáhttá maid darvehit čiekčansihkkelastti rupmašii, muhto ii fal oaivái.