Almmuhus

Almmuhus

Rávis nisson­olbmot eai iskkat goaŧŧo­čoddaga

Borasdávdaregister sádde nissonolbmuide gaskal 25 ja 69 jagi muittuhusa fitnat iskamin goaŧŧočoddaga vai eastadivčče borasdávdda. Čájehuvvo ahte rávis nissonolbmot leat čuorbbimusat čuovvut dán ávžžuhusa. Čájáhusgovva: Berit Roald / NTB scanpix

Juohke goalmmát nisu badjel 55 jagiin ii fina  doaktára luhtte iskamin lea go sus borasdávda goaŧŧočoddagis. Dát vuorjašuhttá Borasdávdaregistara. 

Almmuhuvvuon: 
Vuossárga, 9 Čakčamánu, 2019 - 12:45
Fáddásánit: 

Goaŧŧočoddagis ádjána borasdávda guhká čalgat, ja seallat sáhttet rievdagoahtit easka logenár jagi maŋŋel go dávda njoammu. 

Badjel goalmmát oassi borasdávdabuhcciin leat badjel 50-jahkásaš nissonolbmot. 

– Olu rávis nissoniin leamaš seamma guoibmi vaikke man guhká ja jurddašit ahte de ii leat šat dárbu čađahit iskkademiid goaŧŧočoddagis, muhto dát lea áibbas dárbbašlaš, dadjá Borasdávdaregistara goaŧŧočoddagaprográmma jođiheaddji Ameli Tropé. 

 

Vejolašvuođat fuomášit borasdávdda

Goaŧŧočottaborasdávda njoammu HPV virusa bokte man sáhttá oažžut seksuálalaš oktavuođain. 

Jus fitná iskkademiin jámma, de lea 80 proseantta vejolašvuohta hehtet virusa šaddamis borasdávdan. 

– Lea rievtti mielde hui buorre ahte virus ádjána čalgat borasdávdan, go dalle lea vejolaš dán fuomášit árrat ja eastadit borasdávdda. Lea hirbmat dehálaš čađahit iskkademiid doaktára luhtte nu guhká go mii sáddet muittuhusa dán birra, ja dát guoská dieđusge maiddái nissonolbmuide geain leamaš seamma seksuála guoibmi olu jagiid, lohká Tropé.  
 

Eai čuovo ávžžuhusa

Oallugat geat ožžot borasdávdda goaŧŧočoddagii eai leat iskahan vuolledábiid nu go ávžžuhuvvojit, ja dát gal vuorjašuhttá Borasdávdaregistara čehpiid. 

Čájehuvvo ahte nissonolbmot vuollel 40 jagi leat šaddan čeahpit iskkahit goaŧŧočoddaga, muhto ahte nissonat badjel 55 jagi eai fina iskkademiin jámma. 

Birrasii 67 proseantta rávis nissonolbmuin fitnet doaktára luhtte, ja dat mearkkaša ahte 138 000 nissona dán ahkeluohkás eai mana iskkadeapmái. 

Jahkásaččat buohccájit badjel 300 nissonolbmo goaŧŧoborasdávddain, gaskal 70 ja 90 dáin jápmet dávdda geažil. (©NTB)

Ovdasiiddus dál