Muhtin boazodoallit leat dahkan siskkáldas šiehtadusa mii mielddisbuktá ahte Jovsset Ánte Sara ášši Stáhta vuostá sáhttá dál čoavdašuvvat.
– Boazodoalu siskkáldas iešmearrideami bokte lea Sara geahččalan ja dál gávdnan čovdosa. Guhkit áigge riidu orru de čoavdašuvvamin, dieđiha Eanandoallodirektoráhta preassadieđáhusa bokte.
Áidna guhte ii doahttalan
2012:s gohčui stáhta 231 siidaossosa Oarje-Finnmárkkus geahpedit boazologu.
Ulbmil lei buoret guohtumiid, lossadit njuovvandeattuid ja eanet gánnáhahttivuođa láhčit boazoealáhussii.
230 boazodoalli doahttaledje gáibádusa, muhto Jovsset Ánte Sara válljii diggevuogádaga bokte geahččalit beasadit gáibádusas, čállet direktoráhta bealis preassadieđáhusas.
2017 celkkii Alimusriekti ahte Sara ferte doahttalit stáhta gáibádusa ja geahpedit ealus 75 heggii.
Borgemánus, dán jagi, oaččui stáhta diggevuogádagas dohkkeheami bákkus njuovvat Sara ealu.
– Gulahallama ja ovttasbarggu boađus
Dat priváhtarievttalaš šiehtadus, mii dál lea dahkkon, mearkkaša ahte Saras báhcet 75 heakka 2019 jagi loahpas, ja nu ollašuhttá stáhta gáibádusa.
Stáhta lea čađat čujuhan dasa ahte Sara sáhttá geahččalit oččodit čovdosa eará boazodolliiguin, nu guhká go čoavddus lea dálá njuolggadusaid mielde.
– Dat šiehtadus mii dál lea sis, lea čielga boađus gulahallamis ja ovttasbarggus siskkáldasat boazodoalus ja čájeha ahte iešmearrideapmi sáhttá doaibmat, dadjá Liv Berit Hætta, Eanandoallodirektoráhta Boazodoalloossodaga direktevra.
– Mii rámidat sin geat leat leamašan mielde čoavdit ášši, dadjá son vel preassadieđáhusas.
