Ráđđehus lea sádden evttohusa gulaskuddamii mas áigot dáhkidit ovttasássama buhcciidsiiddas.
– Ráhkisvuohta bistá ollugiin olles eallima. Buozalmasvuohta ii galgga erohallat náittosbáraid geat leat ovttas eallán olles eallima.
Dan dihte evttoha ráđđehus ahte suohkanat galget heivehit dili nu ahte olbmot geat háliidit sáhttet ássat ovttas, lohká vuorrasiid- ja álbmotministtar Sylvi Listhaug.
Ressursan
Ovttasássan lea dehálaš vuorrasiidda geaidda dat guoská, muhto lea maid positiiva dearvvašvuođa- ja fuolahusbálvalussii.
Lagamuččas lea dehálaš diehtu mii lea dehálaš resursa buhcciidsiidii, go dovdá buhcciidsiidda ássi dárbbuid ja sáváldagaid.
– Sáhttá leat dramáhtalaš fárret ruovttus buhcciidsidii. Ovtta beaivvis rievdá olles eallendilli. Ovttasássandáhkádus lea ávkin nu ahte álkida ja láhčá stuorát oadjebasvuođa vuorrasiidda ja lagamuččaide. Dainna lágiin váldá vuhtii vuorrasiid dili, lohká Listhaug.
Evttohusas boahtá ovdan ahte suohkanat galget heivehit fálaldaga nu ahte vuhtii váldet báraid geat háliidit ovttas orrut.
