Norga geavaha máŋggaid miljovnnaid oažžut spiovdnadubmejuvvon Frode Berg ruoktot Ruoššas. Mihttu lea su oažžut ruoktot ovdal friddjavuođaávvudeami mii lea Finnmárkkus golggotmánus.
Dan muitala muhtin gáldu NRK:i mas lea oktavuohta Olgoriikadepartementii.
Golggotmánu 25. beaivvi lea 75-jagi ávvudeapmi go Nuorta-Finnmárkku oaččui friddjavuođa Ruoššas.
Ávvudeapmi lea Girkonjárggas, ja sihke Ruošša olgoriikaministtar Sergei Lavrov, Gonagas Harald ja stáhtaministtar Erna Solberg (Olgešbellodat) servet ávvudeapmái.
Hoahpuha
Frode Berg advokáhtta, Brynjulf Risnes, meidne ávvudeapmi hoahpuha sihke Ruošša ja Norgga.
– Dieđusge dán ávvudeamis háliidit millosepmosit ságastallat eará áššiid birra go Frode Berg. Mun doaivvun ahte lea beroštus guktot beliin dáinna áššiin geargat ovdal dien áiggi, dadjá Risnes.
NRK gáldus, mas lea lagas oktavuohta prosessii, lea guhkes ja viiddis bargovásáhus Norgga olgoriikadoaimmaiguin.
Son meidne resursageavaheapmi dasa ahte Berg oažžut ruoktot lea seamma stuoris go Moland- ja French-áššiin.
Dát ášši lea Olgoriikadepartementii máksán unnimusat 11 miljovnna ruvnnu.
Gáldu dieđuid mielde lea bargu leamaš erenoamáš váttis Norgga ja Ruošša gaskavuođa dihte, Norgga ráŋggáštusain Ruošša vuostá ja earalágan oainnuid Ukraina ovdáneamis.
Olgoriikadepartemeanta dadjá NRK:i ahte Berga ášši meannuduvvo nu movt OD (Olgoriikadepartemeanta) meidne lea buoremusat heivvolaš vuhtii váldit Berga beroštemiid, ja OD bargá máŋgga suorggis.
©NTB
