Geaidnopolitiijat leat dássedit luottaid alde dárkkisteame johtolaga, ja nu ledje ikte maid.
Ávvir čálii ikte go moatti beaivvis leat lahka 50 biilavuoddji šaddan sáhku máksit go leat beare leahtus vuodján.
Ikte leat vel guđas geat šadde «njoalostit bealggi» ja máksit sáhku go leat beare leahtus vuodján.
Vuos viđas Álttás sáhkkohalle go lei beare leahttu luottas gos leahttomearri lea 50 km/d.
Eanemus leahttu lei ovtta biillas, mas lei 65 km/d go geaidnopolitiijat mihtidedje sus leahtu.
Njuolggoluottain gaskal Bigáža ja Áisaroaivvi leat maid dávjá politiijat dárkkisteame. Nu lei ge ikte maid, go okta biilavuoddji sáhkkohalai go vujii 118 km/d báikkis gokko lei leahttomearri 80 km/d.
Dan ovddas šaddá «skoabaldahttit ruhtaburssas» ja máksit sáhku Norgga stáhtii.
