Norggas lassána elbiilajohtu ja dál lea stuorámus lassáneapmi Finnmárkkus. Jahkebealis lassánii johtu beliin.
2019 vuosttaš jahkebealis lassánii elbiilajohtu 140 proseanttain seamma áigodaga ektui diibmá, čájehit Geaidnojohtolaga diehtojuohkinráđi logut.
Vaikke dušše logát biila mii vuvdo Finnmárkkus lea elbiila, de lea gávpemárkanoassi lassánan beliin elbiilajođus.
Dát gal illudahttá stádaministara Erna Solberg.
– Finnmárkkus lea dieđusge ná stuora lassáneapmi go doppe eai johtán elbiillat nu bures ovdal. Dál leat buoret vejolašvuođat láddet elbiillaid Finnmárkkus ja elbiillat mat dál buvttaduvvojit leat buorebut ja dáiguin birgehallá maiddái dálvet. Lea hui movttiidahtti oaidnit ahte elbiilajohtu lassána Finnmárkkus ja eará biriin Norggas, lohká Solberg NTB ođasdoaimmahahkii.
Juohke nubbi biila
Riikkadásis lassánii elbiilajohtu 45 proseanttain vuosttaš jahkebealis dán jagi.
Earret Finnmárkkus, de lassánii elbiilajohtu 93 proseanttain Østfoldas, 92 proseanttain Vestfoldas ja Telemárkkus ges 88 proseanttain.
Maiddái Vestlánddas lassánii elbiilajohtu. Møre og Romsdalas lassánii johtu 83 proseanttain, Sogn og Fjordanes 75 proseanttain, Hordalandas 78 proseanttain ja Rogalandas ges 76 proseanttain.
Jáhkká joatkit
Ovdal geasi sáddii Enova haddejearaldaga ásahit stašuvnnaid Finnmárkui, Davvi-Romsii, Lofuhtii, Helgelánddariddui, Namsosii, Ruoŧa riikkarádjái Hedmárkui ja máttimus Trøndelágii gos elbiilaeaiggádat beasaše biillaidis láddet jođánit. Seamma haddegilvu almmuhuvvo maiddái Nordlánddas dán čavčča.
– Lea hirbmat dehálaš čuovvulit infrastruktuvrra vai dát galggašii doaibmat, dadjá stádaministtar Erna Solberg.
Son jáhkká ahte elbiilajohtu lassána ain Norggas vaikke olu gielddat leat sihkkugoahtán elbiilaeaiggádiid ovdamuniid.
– Elbiilla lea eanemus gánnehahtti oastit go dat han ii luoitte CO2, dadjá son.
Soitet rievdadit divatmávssuid
Go dárkkistedje nationálabušeahta árabut dán jagi, de bođii ovdan ahte stáhta massá 3 miljárdda ruvnnu vearro- ja divatmávssus elbiilajođu lassáneami geažil.
Stádaministtar dadjá ahte ráđđehus soaitá fertet rievdadit vearro- ja divatmávssu elbiilaeaiggádiid ektui boahtte áiggis. Dál eai dárbbaš oainnat máksit momsa ja geardedivvaga.
– Gánnáhahttivuođa ektui fertet rievdadit divatmávssuid vai gokčat goluid mat gártet biillaid geažil, muhto mii leat mearridan ahte ii mihkkege rievdda ovdal 2021, lohká Erna Solberg.
Ráđđehusa mihttun lea ahte buot ođđa biillat mat vuvdojuvvojit 2025 rájes eai galgga luoitit CO2. (©NTB)
