Norgalaš borrá viđa gearddi eanet tomáhtaid dál go 25 jagi áigi.
Norgalaš borrá gaskal 15-20 kilo tomáhtaid jahkásaččat.
Dá lea viđa gearddi eanet go 25 jagi áigi, dalle borai juohke norgalaš birrasii 5 kilo tomáhtaid.
Eanadoallo- ja biebmoministtar jáhkká ahte tomáhtajohtu lea lassánan go dutkit, buvttadeaddjit ja buvddat leat áŋgiruššan dán ovdii.
– Sii leat bures ovttasbargan ja nákcejit fállat birrasii 30 šlája tomáhtaid mat buvttaduvvojit Norggas, dadjá eanadoallo- ja biebmoministtar Olaug Bollestad.
Teknologiija veahkkin
Erenoamáš teknologiijain lea vejolaš šaddadit tomáhtaid birra jagi Norggas.
Buvttadeaddjit mearridit ieža galle gráda galgá gilvvavisttiin ja dáinna lágiin dárbbašit tomáhtašattut maiddái sakka unnit čázi. Ovdamearkadihte geavahit Spanias 60 lihtara čázi juohke tomáhtakiloi, Norggas ges 10 lihtara.
Dasa lassin leat Norgga gilvvavisttiin unnidan klimagássaluoitima beliin 2000-logu rájes.
