Dál leat báhkat vuordimis stuora osiin Norggas. Go leat dát báhkat, de lea dávjá nu ahte mii eat muitte iežamet elliid gozihit. Máŋggas vásihit dat bálget go leat dát erenoamáš báhkat.
Juohke jagi buktet olbmot iežaset elliid, mat leat bealleheakkas báhkkasa dihte, šibitdoaktára lusa go fertejit oažžut divššu.
Muhtin eallit gal ealáskit fas go veahá čoaskuda daid galbma čáziin, ja muhtimat leat fas nu goikan ahte fertejit liige divššu oažžut njuolga varrasuonaide, dadjá Tor Kvinge, šibitdoavttir geas lea čanastat Tryg dáhkádussii ja lea beaivválaš jođiheaddji AniCura elliidbuohcceviesus Bergenis.
Suoivva ja galbma čáhci
Orro ahte ii leat oba duohtage ahte leat 30 lieggagráda máŋgga sajis Norggas bearjadaga ja dán vahkkoloahpa.
Šibitdoavttir sihtá elliid bearráigeahččat hui bures báhkkasis.
Báhkka beaivvádagas gillájit sihke beatnagat ja bussát.
Muitte láhčit elliide saji mii ii leat njuolga goardagis, ja váruhit ahte dain lea čáhci máŋgga sajis man besset čuohkat, sihke viesus ja olggobealde.
Jus eallit álget sáđđat, vuoigŋat rabas njálmmiid ja sis orro heitot dilli, de fertet njuoskadit daid galbma čáziin vai čoskkot.
Ale fal bija sin njuoska ja galbma sihkaldagaid sisa, dadjá son.
Ii ábut beatnaga váldit mielde sáttogáddái.
Šibitdoavttir ii ávžžut beatnaga váldit mielde sáttogáddái, danne go doppe váilu báiki mii lea suoivanis, ja dasa lassin mii oaidnit hui dávjá vahágiid maid beatnagat ožžot go leat sáttogáttis leamaš, nugo háviid maid ožžot lásemoaluin, dahje eará ságge diŋggain.
Ii ábut goasse beatnaga diktit leat biillas guhkit áiggi go lea buolli báhkas olgun.
Beaivváš han lihkada, ja biila mii guđđojuvvo suoivanii go ollet sáttogáddái, sáhttá veahá maŋŋil leat njuolga goardagis, dadjá Kvinge.
Norggas leat sullii 560.000 beatnaga, 750.00 bussá ja 125.000 heastta.
Lea maid nu ahte eai goassege leat olbmot atnán nu ollu dáhkádusa iežaset elliide go dál.
Norgalaččat mákset badjel 200.000 ealli ovddas dáhkádusa ja máksege badjel bealle miljárdda ruvnno diibma elliiddáhkádussii, čajehit logut Tryg dáhkádusas ja Finans Norge.