2018:s duođaštuvvojedje DNA bokte unnimus 138 guovžža Norggas. 63 dáin ledje njiŋŋelasat ja 75 ges varrásat.
Ollu dáin guovžžain leat duođaštuvvon riikkarájiid lahka, nuorttasguvlui, ja doaivumis leat ollu guovžžat dakkárat mat vánddardit riikkarájiid badjel.
Ovddit jagiid
2017:s duođaštuvvo 125 guovžža Norggas. Dat lea 13 unnit go 2018:s. Dalle ledje 55 njiŋŋelasa ja 70 varrása. Jagi ovdal, 2016:s, duođaštuvvo maid 125 guovžža.
Gávcci beassádaga
Duođaštuvvon njiŋŋelas guovžžaid vuođul rehkenastojuvvojit beassádagat mat leat riegáduvvon 2018:s. Dát logut čájehit ahte gávcci (7,7) beassádaga riegádedje. Dat lea okta beassádat eambbo go jagi ovdal (6,9).
Eallinguovllut
Norgga njiŋŋelas guovžžat ellet guovlluin mat leat lahka Suoma, Ruoŧa ja Ruošša riikkarájiid, ja váldoguovllut leat ge Báhčaveadji, Anárjohka, sis-Romsa, nuorta-davvi Trøndeláhka ja nuorta Hedmárku.
Varis guovžžat ges vánddardit eambbo ja nu geavahit stuorit guovlluid. Danne lea ge dábálaš ahte varis guovžžat sáhttet leat vaikko gos Norggas.
