– Iskkadeapmi čájeha ahte measta buohkat ipmirdit ahte sihkkeljealmma lea áidna suodjalus oaivái jus lihkohisvuohta joksá. Danne lean hirpmahuvvan go oallugat liikká eai geavat dan.
Birra jagi duššet birrasii logi sihkkelasti johtolagas Norggas, ja 80:s fas roasmmehuvvet bahuid. Ii leat bággu geavahit sihkkeljealmma, muhto guđas logi olbmos geavahit jealmma muhtumin dahje dávjá, ja gávccis logi olbmos doivot ahte sihkkeljealbma sáhttá gádjut heakka lihkohisvuođas, čájeha varas jearahallaniskkadeapmi man Tryg Forsikring ja Trygg Trafikk leat čađahan.
– Mu valáštallamis leat álo oahppan ahte go juvllat jorret ovddos guvlui, de galgá jealbma geavahuvvot. Dat lea vel deháleabbo johtolagas. Ii leat ávki leat máilmmimeašttirin jus vuojáhalat. Iskka rájiid earaládje, dadjá ekstremavaláštalli Andre Villa preassadieđáhusas.
Logis golmma olbmos eai geavat sihkkeljealmma
Badjel duháha norgalačča leat searvan dan riikkaviidosaš jearahallaniskkadeapmái, mas maid boahtá ovdan ahte golmmas logi olbmos hárve dahje eai goasse geavat sihkkeljealmma.
– Iskkadeapmi čájeha ahte measta buohkat ipmirdit ahte sihkkeljealbma lea áidna suodjalus oaivái jus lihkohisvuohta joksá. Danne lean hirpmahuvvan go oallugat liikká eai geavat dan. Oallugat roasmmehuvvet sihkkellihkohisvuođain, ja de lea jealbma earenoamáš álkes ja hálbbes doaibma garvit bárttiid, dadjá Trygg Trafikk doaibmi gulahallanhoavda Christoffer Solstad Steen preassadieđáhusas.
