Guolit leat šaddan okta dain gálvvuin maid olgoriikka olbmot vigget doalvut lobi haga badjel ráji ja olggos Norggas. Dál leat vuot duoguštan luddejuvvon dorskiid.
Ahte olgoriikka olbmot leat álgán eambbo ja eambbo guliid viggat fievrredit olggos Norggas, lea dál šaddan stuora hástalussan Romssa ja Finnmárku duolloguvlui.
Dan čájeha dat go nu olu guliid leat duoguštan duollostašuvnnain daid maŋemus jagiid.
Dušše odne iđđes leat guokte joavkku viggan doalvut luddejuvvon guliid ráji badjel, Gáregasnjárgga duollostašuvnna bokte.
Dohkkehan sáhku dalán
Vuos álggos odne iđđes árrat, diibmu guđa áiggi, čállet politiijat Twitteris ahte Gáregasnjárgga duollostašuvnnas duoguštedje 90 kilo luddejuvvon dorskiid, maid ii lean joavkkus riekti doalvut olggos Norggas.
Sis duoguštedje daid guliid, ja čálle 18 000 ruvdnosaš sáhku maid joavku dohkkehii dalán.
Golbma diimmu maŋŋel fas bissehedje ovtta joavkku geain ges lei 150 kilo luddejuvvon dorski badjel lobálaš eari maid olgoriikalaččat besset dullekeahttá doalvut olggos Norggas.
Sis maid duoguštedje guliid, ja čálle 30 000 ruvdnosaš sáhku.
Dat joavku maid dohkkehii das sáhku.
Tonnaid mielde guolit
Romssa ja Finnmárkku duolloguovllu logut čájehit ahte dušše miessemánu 31. beaivvi rádjái dán jagi leat guđa geardde bissehan olgoriikalaččaid geat leat viggan doalvut badjel 250 kilo luddejuvvon guliid ovtta fáru mielde badjel ráji.
Oktiibuot leat duoguštan 4,5 tonna seamma áigodagas.
Jus geahččá loguidt, de dat duođaštit ahte viggat lobiheamet doalvut guliid olggos riikkas lea šaddan stuorit ja stuorit hástalus.
2016:s duoguštedje 36 geardde luddejuvvon guliid.
2017:s fas 107 geardde, ja oktiibuot 11 tonna duoguštan guliid
10 kilo earri
Guolástusdirektoráhta njuolggadusaid mielde de oažžu juohke olmmoš, olgoriikalaš ja norgalaš, váldit 10 kilo guoli olggos Norggas.
Jus lea bivdán registrerejuvvon guolástusdoaimmahaga olis, de lea dat earri 20 kilo. Dan galgá sáhttit duođaštit olihit dan eari beassat doalvut olggos riikkas.
Dasa leat maid vel eará njuolggadusat. Jus eari árvu lea badjel 5000 ruvnno, de ii leat lohpi dušše doalvut, de galgá dullehit gálvvu.
