Almmuhus

Almmuhus

Artisttaid dienas lassána, muhto olu lági­deaddjit rahčet

Konseartadoaibma lea logi jagis olu rievdan. Govven: Risten Biret Elle Eira.

Konsearta ja lávdedoaibma ii leat goassege leamaš nu dehálaš artisttaide go dál lea. Maŋemus logi jagis lea konseartadoaibma rievdan olu, go olbmuid musihkkadábit leat rievdan.

Almmuhuvvuon: 
Maŋŋebárga, 18 Geassemánu, 2019 - 15:19
Fáddásánit: 

Bealli artisttaid dietnasis boahtá konsearttain, ja sullii 60 proseantta álbmogis finadit konsearttain, lea Bård Kleppe čállán girjjis man Kulturráđđi lea diŋgon, mii almmuhuvvui dán vahkku.

Ođđa dienaslassáneamis čuvvot maid profešunalitehtagáibádusat juohke lađđasis.

– Olles suorgi lea čađahan juogalágan profešunalitehtabarggu. Sii geat leat profešuneallat, leat šaddan eanet profešuneallan, ja eaktodáhtolaččat leat maid šaddan čeahpibun, seammás go muhtin oassi eaktodáhtolaččain leat hui profešuneallan šaddan. Geahččit vurdet čehppodaga, artisttat, eiseválddit ja veahkit vurdet maid dan. Go ovtta oasis vurdet profešunalitehta, de bidjet gáibádusaid earáide, lohká čálli Bård Kleppe.

 

Eanet konsearttat vuolláibáhcagiin

Vaikko dienaslassáneapmi lea allat, de gártet eanaš konsearttat vuolláibáhcagii. Logut čájehit ahte measta 63 proseantta gártet vuolláibáhcagii, ja badjelaš 31 proseantta besset badjebáhcagii, ja vihtta proseanttas ii leat dienas ii ge táhpa.

– Dain 787 lágidemiin maid geahčadeimmet, de ledje 249 konseartta main dinejedje, ja 495 main táhpejedje, ja 43 main ii lean dienas ii ge táhpa, čilge Kleppe.

Kleppe čilge ahte leat gávnnahan stuora erohusaid daid stuorimus lágideddjiid gaskkas. Earret eará ožžot guokte dain stuorimus lágideddjiin measta beali stáhtadoarjagis go leat lágideaddjin.

– Mii oinniimet ahte guokte lágideaddji, mat ožžot doarjaga stáhtabušeahtas, de ožžot measta beali stáhtadoarjagis mii addo lágideddjiide. Oinniimet maid ahte festiválaid vuoruhedje eanet go lágidemiid mat leat birrajagi, earenoamážit eaktodáhtolaš lágideddjiid ja studeantalágideddjiid. Lágideaddjit geat barget birra jagi ožžot sullii 75 miljovnna ruvnno stáhtabušeahtas, ja festiválat fas ožžot 150 miljovnna, lohká Kleppe.

 

Vuorjašuhtti

Norgga kulturfoandda Lágideddjiid- ja festiváladoarjjaortnega lávdegotti jođiheaddji Jan Ole Otnæs oaivvilda ahte girji čájeha bures movt konseartaealáhus lea ovdánan ja movt dat sáhttá šaddat boahtteáiggis. 

– Girjjis oaidná čielga tendeanssaid lágideddjiid bealis, ja lea illudahtti oaidnit ahte konsearttat leat nu dehálaččat artisttaide dál, muhto lea vuorjašuhtti go nu olu konseartalágideddjiin lea vuolláibáza. Dat lea ovdáneapmi man mii dárkilit čuovvut go galgat ovdánahttit doarjjaortnegiid lágideddjiide geat barget birra jagi, lohká Otnæs.

 

Ovdasiiddus dál