Ovlla Per Skoglund Sara ja Áltá 2 derpe Nordlysa Finnmarkshallenis Álttás.
Áltá 2 ii heaitán bidjamis spáppa mollii ovdal go boađus lei 14-0. Ovlla Per Skoglund Sara coggalii golbma moala čiekčamis.
Muđui ledje moallabáhččit:
Jørgen Brandser Hammari 3, Chris Martin Cello Strand 3, Tom Kristensen Emaus, Brian Rognli Kravik, Vebjørn Atle Skorpen, Johan Mikkelsen Gaup ja Gabriel Filip Åkesson.
Vuosttaš čiekčan
Nils Olaf Olsen Eira Hætta čievččai iežas vuosttaš čiekčama Nordlysa ovddas maŋŋel go manai Guovdageainnus Nordlysii.
Son lea ge nubbi guovdageaidnulaš Nordlysa joavkkus dán áigodagas.
Ole Johnny Jansen lea čiekčan buot čiekčamiid ovdal go roasmmehuvai Deanu vuostá, čiekčamis man Nordlys vuoittáhalai 1-0.
