Nordlys vuoittáhalai iežaset čihččet čiekčama eai ge leat vel ožžon čuoggá dán áigodagas. Porsáŋgu fas doarru njunnošis go viežžaledje golbma čuoggá Deanus.
Lávvordaga finadii Bossogohppi Kárášjogas, Niitoguolbanis, viežžaleamen golbma čuoggá go časke Nordlysa 4-0.
Bossogohpi moallabáhččit ledje Pål Even Heggelund 2 ja Mathias Nikolai Nyberg.
Nordlys coggalii ovtta spáppa iežaset mollii.
Porsáŋgu časkii Deanu
Porsáŋgu fas finadii Deanus čiekčamin Deanu vuostá.
Deatnu álggii čiekčama bures ja coggaledje vuosttaš moala go čiekčan lei bistán minuhta. Ørjan Fidje Store lei moallabáhčči.
Porsáŋgu jorgalii čiekčama go Tobias Borch, Mads Petter Utsi ja Per Arne Østgård coggaledje moalaid.
Njunnošis
Fállejohka ja Porsáŋgu leat njunušjoavkkut Finnmárkku njealját divišuvnnas.
Goappašagat leat čiekčan guhtta čiekčama ja čoaggán 15 čuoggá.
Deatnu lea gávccádin 7 čuoggáin ja Nordlys lea buot vuolemusas 0 čuoggáin.
