Doalvesearvi lea čállán Kárášjoga gildii ja jearran eai go sáhtášii máhcahit fas leahttočomi man válde eret moadde jagi áigi.
Jeagilvármáđis Kárášjogas lei ollu jagiid leahttočopmi, muhto báikkis lea lohpi vuodjit 50 km/d ja gielda válddii dan dihte eret leahttočomi.
Dál váillaha Kárášjoga doalvesearvi leahttočomi ja ákkastallet ahte báikkis rasttildit ollu mánát ja nuorat luotta, beaivválaččat.
– Doppe leat máŋgii leamaš measta lihkohisvuođat, ja danne mii dál háliidivččiimet ahte báikkis vuoliduvvo leahttomearri ja ahte leahttočopmi máhcahuvvo fas. Ferte go báikkis dáhpáhuvvat lihkohisvuohta ovdal go dahkko mihkke? Mis ii leat oktage massit, čállá doalvesearvi gildii.
