Nággu gii galgá čohkkát Finnmárkkuopmodaga stivrras sáhttá dagahit sori Finnmárkku ja Romssa ovttastahttimii.
Finnmárkku fylkkadikki ja Suohkan- ja ođasmahttindepartemeantta čielggadančoahkkimis duorastaga ii boahtán čoavddus.
– Lea čielggas ahte departemeanttas lea hušša. Dat doabastit dan álkimus čovdosa ja hohpohallet, vai besset doalvut ášši Stuorradiggái ja leat gearggusin jahkemolsumii, dadjá fylkkasátnejođiheaddji, Ragnhild Vassvik, preassadieđáhusas NTB:s.
Evttohan nammadit golbma stivramiellahtu
Departemeanta lea evttohan nammadit golbma stivramiellahtu Finnmárkku fylkkadikkis geat sirdojuvvojit Finnmárkku ja Romssa ovttastahtton fylkkadiggái.
Vassvik oaivvilda dan leat Finnmárkkulága áigumušaid vuostá, mii galgá ovddastit Finnmárkku álbmoga.
Finnmárkku fylkkadiggi lea evttohan departementii ahte baicce ráhkadit suohkanmodealla, mas Finnmárkku suohkanat válljejit dan golbma stivramiellahtu.
– Dat masa mii sakka reageret, ja maid mii fuomášuhtiimet odne, lea ahte sii beare unnán leat čielggadan alternatiivvaid. Sii eai leat árvvoštallan váikkuhusaid iežaset evttohusas ge. Go lea láhkarievdadeamis sáhka, de mii vuordit vuđolit ovdabarggu, dadjá fylkkasátnejođiheaddji.
Šiehtadan boahtte deaivvadeami
Stáhtačálli Anne Karin Olli ii áiggo duođi eambbo kommenteret ságaškuššama, muhto muitala ahte oasálaččat leat ovttaoaivilis deaivvadit fas.
Vassvika dieđuid mielde galgá boahtte čoahkkin leat loahpas dán mánu.
Garra vuostálastimat
Romsa ja Finnmárku galget plána mielde ovttastahttot oktasaš fylkan jahkemolsumis 2019/2020.
Leat leamaš garra vuostálastimat earenoamážit Finnmárkkus, sihke politihkkariid ja álbmoga bealis.
Finnmárkkuopmodat (FeFo), mii vuođđuduvvui 2006:s, eaiggáduššá 95 proseantta Finnmárkku eatnamiin, ja lea riikka nubbin stuorámus eananeaiggát.
