Almmuhus

Almmuhus

Eanet bivdo­earit mearra­sámi guolá­steddjiide

Čájáhusgovva: Berit Roald/NTB Scanpix

Sámediggeráđđi Silje Karine Muotka deaivvada Ealáhus- ja guolástusdepartemeantta politihkalaš jođiheddjiiguin boahtteáiggi bivdoearrevuogádaga konsulteremii.

Almmuhuvvuon: 
Gaskavahkku, 15 Miessemánu, 2019 - 15:57
Ođastuvvon: 
Ođastuvvon: 16.05.2019 - 09:25
Fáddásánit: 

Ealáhus- ja guolástusdepartemeanta ovddida miesse-geassemánu molsumis Stuorradiggedieđáhusa ođđa bivdoearrevuogádaga birra guolástusain.

Sámediggi deaivvada ráđđehusain konsulteremii duorastaga miessemánu 16. beaivvi. 

– Mii gáibidat mearrasámiid vuoigatvuođaid nannema, stuorát bivdoeriid vai sáhttet bivdit birgejupmin ja dasto eanet váikkuhanfámu dáid resurssaid hálddašeapmái. Midjiide lea deaŧalaš sihkkarastit ahte guollebivdit doaibmaguovllus sáhttet oažžut birgejumi guolástusas, dadjá Muotka preassadieđáhusas. 

Maiddái opposišuvdnajođiheaddji Ronny Wilhelmsen (Bb) searvá konsultašuvnnaide. 

 

Mearrasámi servodaga sihkkarastin

Boahttevaš stuorradiggedieđáhus lea hui viiddis ja guoská buot fanasjoavkkuide.

Sámediggi áigu váldoáššis bargat áššiiguin main lea stuorra mearkkašupmi mearrasámi servodagaide. 

– Mis lea fokus ahte buoridit sin eavttuid geat bivdet riddolagaš guovlluin ja vuotnabivddus, sihkkarastin dihtii barggolašvuođa ja ássama mearrasámi guovlluin. Dat lea leamaš min vuolggasadji oppa áiggi, dadjá sámediggeráđđi. 

 

Háliida fokuseret birrasa 

Sámediggi áigu geassit ovdan maiddái birrasa ihtáš konsultašuvnnain.

Jos fanas ii nagot ollašuhttit birasgáibádusa ja unnidit boaldámušgeavaheami, de ferte sis unnidit bivdoeriid ja dietnasa. 

– Dat lea buorre ja ovddasvástideaddji dálkkádatpolitihkka ahte unnidit luoitimiid ealáhusas, ja mii oaivvildat ahte guollebivddu ja luossabiebmama ásahemiin ferte atnit muittus birrasa. Guollehálddašeapmi ferte leat ceavzil, ja dalle ferte duostat maiddái bidjat gáibádusaid, loahpaha Muotka preassadieđáhusa.

Ovdasiiddus dál