Čáppa ja servodatlaš lávlagiiguin lea folk-musihkkaduo Niillas Holmberg & Roope Mäenpää beaggán ja lea boahtán bálgás geahčái. Duo čuojaha maŋimuš konseartta Anáris boahtte lávvardaga, dieđiha Tuupa Records.
Ovdal go áibbas loahpaheaba musihkkamátkki, de čuojaheaba iežaska maŋemus konseartta boahtte vahkkoloahpa.
– Mannan čavčča konseartamátkkis Duiskkas láttai dat jurdda, ahte gal dát lávlagat álget leat lávlojuvvon. Ovddabealde vuorddašit ođđa barggut, eange hálit guođđit dán heaŋgasaddat. Moai goit háliidetne čuojahit vel oktii iežame áŋgiris guldaleddjiide, mat leat lihkus leamašan valjis, lohká váldooasi duo lávlagiin šukŋen ja heivehan Holmberg.
Stuora mearkkašupmi
Duo lea beaggán Holmberga sevdnjes jienain, Mäenpää hutkás sello- ja pianoheivehusaiguin ja servodatlaš lávllasániiguin.
Niillas Holmberg & Roope Mäenpää leat almmuhan guokte skearru Tuupa Records bokte; Manin guottán girjji fárus (2011) ja Assimilašuvdna blues (2014).
– Illudan go dát fearán oažžu dakkár loahpahusa, man dat mu mielas ánssáša. Dán barggus lea leamašan stuorra mearkkašupmi dáiddárin ja olmmožin šaddamis – danin lea dál vejolaš buriin mielain geahččat ovddosguvlui, oaivvilda Roope Mäenpää.
Logi jagi áigi
Duo čuojahii vuosttas háve Anáris logi jagi dassái, gierdu dievvá, ja Anárii mátki maiddái nohká.
Konsearta lágiduvvo Anáris kulturguovddáš Sajosis lávvardaga 25.5. eahkedis.
Maŋŋelis loaiddasteaba ráppár guovttos Ailu Valle ja Amoc Hotelli Kultahovis.
